أهلا أهلا يا رمضان
أهلا يا رمضان
بقلم / نجلاء علي حسن
أهلاً أهلاً يا رمضان
هِلّ علينا بكل أمان
فاكرين وسط حارتنا زمان
لمّا جيراننا وكل أحبابنا
الكل يهني وهو فرحان
ونعلق زينة في شوارعنا
ونتسحر، نفطر، نسهر
سوا مع بعض في كل مكان
جارنا مسيحي وجارنا المسلم
مبتفرقش في مصر عشان
مصر هتفضل وِحدة ووَاحدة
طول العمر وكل أوان
أمي وخالتي «جارتنا إيفون»
كانوا إخوات مش بس جيران
من خير مطبخنا ومطبخهم
خير بيكفي الكل كمان
أطباق طالعة وأطباق نازلة
تملا موائد للرحمن
والفرحة بترقص في عينينا
لما بيضرب قبل المغرب
مدفع إفطار، والشيخ رفعت
يأذن وبصوت كله حنان
ونروح نفطر بعد آذان
والتسابيح والذكر ونحفظ
اللي اتيسر من القرآن
لسه في مصر اللمة الحلوة والتفاريح
فيها بنسمع أجمل غنوة والتواشيح
وحوي يا وحوي.. حالو يا حالو
أهلاً رمضان
رمضان جانا.. افرحوا يا ولاد
ورمضان يجري ونقول بدري
نفرح بعدها بالأعياد
مهما هنكبر، بفانوس أخضر
هنغني ويّا الأولاد
ونقول على مر الأزمان
أهلاً أهلاً يا رمضان.
الفراشة الزرقاء 🦋
