فاطمة السيد مبدعة ورائدة فن التابستري
انا فاطمه السيد متزوجه وام لبنتين وولد شغل الهاندميد هوايتى بحبه جدااااا من وانا عندى 14 سنه بشتغل كل انواع الهاندميد كروشيه ، تريكو ، تطريز ، لاسيه ، ايتامين ، مكرميه مكنتش بحب اخرج اد ماكنت بحب اشتغل كنت بسوق شغلى بين الاقارب والمعارف . امى كان ليها فضل كبير جدا عليا انى اتعلم شغل الهاندميد . مريت بأزمات كتير فى حياتى زى مرض اختى ووفاتها وبعدها امى بنفس المرض وكانت صادمه كبيره ليا وفاتها بعدها حسيت انى خلاص انتهيت ووقفت شغل فتره بس كنت دايما بفتكر كلام امى الله يرحمها وهى بتشجعنى فقررت انى ابدأ شغل من تانى وبدأت اظهر شغل من خلال السوشيال ميديا وبدا كل اللى يشوف شغلى يعجبه . فى 2017 قابلنى فن جميل جدا بس مكنتش اعرف اسمه ولا طريقته وهو فن التابسترى حاولت اتعلمه بس للاسف مكنش ليه فيديوهات بالعربى غير فيديو واحد شوفته بس مكنش بيشرح بشكل كافى اخدت الفكره وحاولت اعلمه لنفسى ولما اتمكنت من شغله وبدأ كل اللى يشوف شغلى يطلب طريقه التنفيذ من هنا جت فكرة القناه قررت اشرح عليا كل شغلى وشرحت شغل التابسترى بكل تفاصيله وكنت اول واحده فى مصر اشرح الشنطه التابسترى من البدايه للنهايه والحمدلله ناس كتير استفادت من شرحى وبقا ليا متابعين من مصر وخارج مصر . وكان ليا الشرف لاختيار شغلى انه يتعرض فى دولة البحرين فى احدى المؤتمرات وكتبت عنى اكثر من مجله وكنت سعيده جدا ب جريدة الجمهوريه لما كتبت عنى ولقبتنى ب ( رائدة فن التابسترى فى مصر ) وأطلقوا عليا الجميع بأكثر من لقب ( ملكة التابسترى ، أستاذة التابسترى ، وحش التابسترى ، اميرة التابسترى ) وانى تربعت علي عرش فن التابسترى .
