عام
أخر الأخبار

القهوة وما فيها 

بقلم : مها بدوي الحلقة الأولى 

القهوة وما فيها حلقات مسلسلة لعشاق الجمال الاسمر الملقب بالقهوة

زمان …. وأيام زمان … كل واحد فينا ليه ذكرياته بتاعت زمان … ذكريات عشها بنفسه … او ذكريات وصلته من حبايبه واصحابه … ذكريات شافها واتمنى يعيش فيها …. حاجات كانت زمان بتتعامل في البيوت وما حدش كان بياخد باله منها

ارتبطنا بيها ورسمنها في خيالنا واتمنينا لو كنا عشناها …. حاجات لما سمعناها اتعلقنا بيها

انا الحقيقة سمعت واتعلقت بحاجه جميله كانت بتتعمل في كل البيوت زمان وكانت عنوان للرقي والروقان والمزاج… كان ليها طقوس للتقديم والتسويه والتحميص والطحن .

القهوة …    … البن …. زمان كانت صينية القهوة موجودة في كل بيت مكونه من سبرتايه كنكه مطحنه بن يدويه وبعض الاحيان محمصه صغيره كله ده محطوط في صينية نحاس …. كل الكلام ده متلمع وبيبرق ومحطوط على البوفيه في مدخل الشقه …. وقت شرب القهوة غالبا بعد الغدا وقت العصر كده … وبتبدا مراسم شرب القهوة لما ست البيت تطلب عدة القهوة وتبدأ تطحن تحويجة بن فيها شوية جيهان مع زر قرنفل وحبوب قهوة متحمصة للدرجة المطلوبة وتبدأ تطحن….. لغاية ما تبقى ناعمه خالص …. تبدأ تدوب السكر في المايه الساقعه وبعدين تحط معالق بن بعدد الفناجين اللي هتتعمل ويدوبك تافها لفة او اتنين في الكنكه وتولع السبرتايه وتحط الكنكه وتبدأ الحكاوي الحلوة وهي عينيها على القهوة …. لغاية ما تحس ان السطح طلع شوية من غير ما يقلب … تنزل الكنكه من على النار بالراحة وتغطي السبرتايه بالطربوش بتاعها وترص الفناجين .. وبحسبه سريعه في دماغها تبدا تصب في كل فنجان شوية من الوش … وبعدين تكمل … باقي الفناجين لغاية ما تتملي للاخر …. تحط الفنجان على الطبق بتاعه وتقدمه من غير ما ايدها تتهز هزه واحده … ومعاه كباية مايه ساقعه … عادة اللي هيشرب القهوة بشرب الاول من المايه علشان ينضف مراكز الإحساس في اللسان … ويشفط اول شفطه في القهوة اللي بتنزل في قلبه وعقله مش في بطنه ويشعر بإحساس السلطنه وسعادة ولازم يطلع من بقه قولت … الله تسلم ايديكي …. من هنا نعرف ان

القهوة دي مزااااج خاص جدا☕☕☕ … كل واحد ومزاجه …. لكل واحد تحويجته الخاصه وتحمصته وكمان طقوس شرب القهوة …. ايوه القهوة ليها طقوس معينة … لو ما تمتش زي ما احنا متعودين … مش هنتكيف ونتبسط بالقهوة

زماااان كان أماكن بيع البن معروفة في القاهرة …. موجودة من اول باب اللوق مرورا بوسط البلد والسيدة زينب لغاية ما نوصل عابدين… المنطقة دي من اول ما تقرب منها تبتدي تظهر ريحة البن المحمص وكل ما تقرب تحس ان مناخيرك بقت مليانه بن ….. احساس جميل … ولو قربت من محل من المحلات دي هتبتدي تميز ريحة الاضافات …هتشم ريحة الحبهان القوية المميزة …. هتشم ريحة زر الورد وزر القرنفل … وتشوف جوزة الطيب وتلاقي شوية زعفران احمر من اللي قلبك يحبه …. وتشوف تلات او اربع ماكينات كبيرة … لون البن فيها مختلف درجة من درجات البني من اول الفاتح للاغمق والاغمق لغاية ما تلاقي لون بني مايل الاسود…. وتلاقي ايدين ممدوده بتطلب تحويجة معينه … ناس تقول نص فاتح على نص غامق وشوية حبهان… وناس تقولك تلات تربع غامق على ربع فاتح وزر قرنفل …. عالم كبير وغويط ومع كل زبون تشم ريحة مختلفة عن اللي قبلها وايد تتمد بقرطاس ورق بني تخين ملفوف لفة كويسه يناوله للزبون ويقوله طلبك يا استاذ

تلاقي واحد داخل يقوله البن بتاعكم حبشي ولا يمني …. يقوله لا يا افندي احنا متخصصين في البن الحبشي الفاخر … يقوله تمام اديني ربع غامق بالحبهان

بعد كده عرفنا أن البن ليه مناطق بتزرعه… المناطق دي ليها مميزات خاصه .. مناطق حارة الشمس فيها قوية وجامدة… علشان تساعد البن يستوي بسرعة ويتعتق وتتشقق حبوبه … اليمن الحبشه اللي احنا نعرفها دلوقت باثيوبيا بس زمان كانت معاها كينيا ووسط أفريقيا … البرازيل … كل المناطق الحارة هتلاقي فيها زراعة البن

نوع البن بيختلف حسب كمية الكافيين فيه … العالم فيه خمس أنواع مشهورين بس احسنهم نوعين ارابيكا وروبوستا …

من بكرة ان شاء الله نقول الطحنات المختلفة وكل طحنه بتعمل اي نوع من القهوة… واسامي القهوة من اول الحزايني مرورا بالفريسكا مع المانو والسرياقوسي … وأنواع الأدوات الحديثة اللي ظهرت في السوق لعشاق هذا الجمال الأسمر المسمى بالقهوة… اشوفكوا بكرة ان شاء الله … ان شاء الله الحلقة الجايه تشرح أنواع البن وطحناتها المختلفة وتحميصها وعمل الأنواع المختلفة الحديثة منها …

القهوة وما فيها 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى