خايفة
خايفة
بقلم / فاتن جلال
خايفة حكاية اليوم الي : أولادي الإعزاء
أظن الوقت بقي مناسب لإعترافي الخطير اللي هاقوله
أنا في كل مرة كنت خايفه
كل مرة إيه ؟؟؟؟؟!!!!!!!
كل مرة ……كل مرة لأي حاجة كنت خايفه
لما اتحركتوا جوايا كنت خايفه،لما لفوكم في كوڤرته صغيرة وحطوكم في حضني كنت خايفه
لما قالولي حطيه علي صدرك هو عارف هايعمل ايه في كل مرةمع كل واحد فيكم كان نازل عارف رزقه فين ولو بقي علي صدري هايرضع ازاي وانا اللي كنت خايفه حتي بعد ما جربت أول مرة.
لما اتحركتوا علي الارض واتسندتوا ومشيتوا كانت الخطوات الثابتة من نصيبكم وأنا اللي كنت خايفه
في كل مرة يبقي وقت الفطام (كان بيبقي علي عيني أحرمكم من حاجة بتحبوها ومتعلقين بيها لكن كنت عارفه انه أوانه ولازم ننتقل لخطوة جديدة كنت قوية وحاسمة، بس كنت خايفه)
اما جه وقت النزول والتعامل مع بشر تانيين وتعليم ودراسة كان شكلي وتصرفاتي وثقة اللي حواليا بتقول إني حد فاهم وبيطبق كل كلمة درستها في علم النفس التربوي وكل كتاب اشتريته وكل كورس اشتركت فيه علشان ابقي أم فاهمة وواعية وعندها خطة لكن الحقيقة
بعلنها قصادكم وقصاد العالم أنا كنت خايفه
كل نصيحة طلبتوها أو علاقه قيمناها سوا وشفت عيونكم بتلمع لمًا كلامي طلع صحيح كان صوت ضربات قلبي عالي قوي بس أنا خبيتها في أوضة معزولة أحسن تسمعوها وتعرفوا إني خايفه أكون غلط وأخسر ثقتكم في حكمي
كل مرة حصلت مشكلة وجيتوا بسرعة تطلبوا إني أتدخل ووقفتم مبهورين بيا وأنا بحلها وكأني الساحرة الطيبة في الحدوتة اللي عندها حل لكل مشكلة😂اللي قلبت الفار حصان والقرع عربية لسندريلا أنا كنت خايفه ومرعوبة وكل تفكيري في الساعة اتناشر اللي السحر هايخلص فيها🥺
كل مرة أخفقتم ولا غلطتم فيها كان صوت اللوم العالي والشجب والتنديد اللي بتسمعوه والعقاب اللي بيتوجه ليكم وصباعي اللي بيتوعدكم وبيخوفكم بقية الإيد كانت بتشاور عليا وبعدد صوابعها الباقية ضاعفت العقاب لنفسي كنت خايفه يسحبكم التيار من بين إيديا وتضيعوا مني
كنت بشجعكم علي فطامنا الكبير في التفكير والقرار والإختيارات المصيرية وبزق كل واحد فيكم ناحية درب حياته الخاصة وبشجع وبملي ودانه إنه يقدر علي كل حاجة بس يكشف عن معدنه الغالي المميز وماسكة كشاف نور بشاور بيه علي جوهرته الخاصة وبقوله هنا الكنز
وأنا جوايا بتنفض من الخوف وبكلم نفسي زي المجاذيب(خلاص كده إنتي عارفة بتعملي ايه بتكتبي أخر الحدوتة بتبني شخصيات مستقلة وقوية و شوية ومحدش هايحتاج ماما تاني فاهمة ده كويس؟؟؟؟؟؟؟؟)
اه فاهمة بس خايفة ماعملش الخطوة دي ابص حواليا الاقيني ربيت دلافين في عرض أحياء مائية بتعمل حركات اتدربت عليها علشان تاخد سمكة من المدرب ،رغم ان ربنا خلقها واداها من الذكاء اللي خلاها تعاشر القروش لكن ماتتغيرش وتعرف تعافر في التيار الجارف ووقت مابتلاقي حد محتاج مساعدة ما بتستناش حد ينده عليها ويطلب ،ومجرد ظهورها بيحول المأساة للحظة نجاة وفرح
ببص حواليا الاقي الدماغ كبرت والحُجة بقت واضحة والمعرفة مش قادرة أجاريها مهما بحاول (طبيعة الأشياء)
من أول برمجة التليفزيون و باسوورد التليفون لحد تخصصات معقدة بحتاج تفسير منكم بمصطلحاتها بتشرحوها بكرم وسعة صدر لماما اللي شرحت الف أرنب وبه بطه 😂 ماتحرمش من جملة عارفة يا ماما ؟🥰🥰
مش عارفة ياحبايب قلبي عرفوني🥰🥰
لو قعدت أكتب عن مخاوفي طول الرحلة هاصعب عليكم ومش هاتقدروا تفهموا إن مسند ضهركم كان طول الوقت خايف يقع بيكم
صحيح اللي قبلنا قالوا(مفيش حاجة بتختشي من أوانها )لكن مخوفي الجبارة لسه بتعيد تشكيل نفسها علشان تطلعلي في الضلمة مهما سيبت وناسة علاقتنا منورة !!!؟؟؟
يمكن ده تمن النجاح؟
يمكن؟
يمكن لو ماكنتش خوفت ماكنتش اتعلمت واتحركت بحذر؟
يمكن؟
يمكن ده مصدر الطاقة اللي بتخليني بسبع تلسن 😂😂😂😂اما بتحتاجوا رد مني او رأيي في اي موضوع ؟يمكن
معنديش إجابة قاطعة لأني والحقيقة بعترف إن كل مرة ورا رأيي الحازم وكلمتي الواحدة اللي مابتتكسرش ومواقفي المعلنة اللي مابغيرهاش فيه قلب خايف ومرعوب وهايفضل كده❤️
#مامافاتن
