Cevapi سيفابي او الكباب البوسني
معكم مي هندي : انهارده رايحين البوسنة 🇧🇦
هناكل طبق الاكثر شعبية في البوسنه ولازم تتوارثه الاجيال ويكونوا علي درايه كامله ازي بيتعمل🤩اكلتنا انهارده هي Cevapi سيفابي او الكباب البوسني عبارة عن لحم مفروم بيتحضر بشكل مختلف وبيستوي علي شوايات فحم خاصه وبيتقدم جمبه خبز معين اسمه Lepinja وصلصة مميزة جدا عبارة عن فلفل احمر مع باذنجان اسمها Ajvar اجفار وكريمة kajmak
يقال ان اللي ادخل الوصفه الي سراييڤو والبوسنة هم العثمانيين ولكن بعد كده طور الطهاه البوسنيون الوصفه وغيروها لحد ما وصلوا للكباب البوسني اللي هو اصبح مختلف تماما عن الكباب العثماني ..
كفايه رغي وندخل في المفيد 😅
🌙الكباب البوسني Cevapi
كيلو لحم مفروم ناعم ٥٠٠ جم بقري و٥٠٠ ضاني
معلقه كبيره توم مفروم
ملح فلفل
معلقه صغيره بيكينج صودا
٥٠ مل ميه
🌙صلصة الفلفل الاحمر والباذنجان Ajvar
٤ فلفل احمر
١ باذنجان
٤-٥ فصوص توم
١/٣ كوب زيت زيتون
بابريكا ملح فلفل
٢ م ص خل
🌙العيش Lepinja
٣ كوب دقيق مخبوزات
كوب ل كوب وربع ميه فاتره
٣٠ مل حليب فاتر
م ص خميرة
م ك سكر
٨ جم ملح
🌙الكريمة او kajmak
جبنة كريمي
ساور كريم
جبنة ڤيتا
🌙لتحضير الكباب
اول حاجة هنحط التوم المفروم في نص كمية الميه ونحطهم علي النار دقيقتين كده وبعدين نسيبه يبرد..نحط البيكينج صودا في نص كمية الميه التاني وبعدين نضيفه علي اللحمه المفرومه وبعدين الملح والفلفل نقلب كله سوا، يبقى كويس لو عدينا اللحمه بعد كده من المفرمه كمان مره..ندخلها بقي التلاجه لمدة ساعه او اكتر..
نبدأ بعد كده نشكلها صوابع المفروض شكلها بيكون اسطواني ممكن نشكلها بايدنا (ندهنا زيت الاول) لان المفروض ليها حاجة معينه بتستخدم علشان تطلع بشكلها التقليدي بتاعها طب هنعمل ايه هنستخدم كيس بتاع السندوتشات هنمسحه من جوا زيت وهنشكل اللحمه كور هندخل كوره جوا الكيس ونزقها بحاجة طويله زي spatula مثلا هنضغط علي اللحمه من جمبها فهتتفرد علي الشكل الاسطواني المطلوب، في حل تاني لو عندنا وشوش زي بتاعة بلح الشام والحاجات دي هنستخدم واحد بس ميكونش مشرشر طبعا يكون دايره عاديه وكبيير ندهنه زيت وندخل اللحمه ونضغط هتتطلع واخده الشكل اللي عايزينه..وممكن نشكله صوابع عاديه يرجع لكل حد حابب ايه..
نجيب بقي شوايه، شوايه الطاسه دي بتاعة ايكيا او كهربا او فحم ونحط عليها الكفته ونحركها كل شويه ندحرجها كده علي بعض😅وبتبقى قصيره ومبالغه كده 😅 ندحرج بقى لحد ما تستوي وتبقي ريحتها لا تقاوم🤤
الcevapi بقي بيتقدم مع عيش وصلصه وجبنه كريمي كده ..
🌙ندخل على Ajvar
الصلصه دي اختراع طعمها حلو جدا وتنفع dipping sauce مع حاجات تانيه😋
نجيب الفلفل الاحمر ونقطعه ونوزع عليه زيت زيتون ونحطه علي ورق زبده ومعاه الباذنجان وندخله الفرن، تمام جهزوا نطلعهم ونحطهم في بوله ونغطيها بيبلاستيك ١٠ دقايق مثلا، بعدها نشيل القشره الرفيعه اللي بتكون موجوده في الفلفل ونشيل قشرة الباذنجان ، ناخدهم علي الكبه ونحط عليهم التوم والزيت الزيتون وملح وفلفل نضربهم كويس ، ننقلهم علي النار ونسيبهم علي نار هاديه جدا لحد ما الخليط يتقل ويتركز، في الاخر نحط الخل ونظبط الملح وبالهنا 😋
🌙العيش
هنحط السكر والخميره في الحليب نقلبهم ونغطيهم ونسيبهم ٥ دقايق..نحط بقي الملح علي الدقيق وبعدين خليط الحليب ونزود الميه شويه شويه ونعجن لحد ما تتكون عجينه طريه مش بتلزق في الايد..نحطها في بوله ونسيبها تخمر ساعه ساعه ونص لحد ما يتضاعف حجمها نجيب العجينة ونديها بقبضة يدي👊🏻😅نحطها علي الكاونتر تاني ونعجنها كمان مره ونحطها في بوله ونسيبها تخمر كمان كره ٣٠-٦٠ دقيقه
نرش دقيق علي السطح اللي هنشتغل عليه نحط العجين نقسمه ٣ كرات ونفرد كل واحده دايره قطرها ٢٠ سم ، ننقل كل واحده علي ورق زبده ونغطيهم ونسيبهم يخمروا كمان مره ٣٠ دقيقه..
نكون فاتحين الفرن علي اعلي حاجة، ونحط تحت خالص صينيه فيها ميه ونشيل العجينه بورقة الزبده علشان صوابعنا متبوظهاش وننقلها علي رف الفرن وهو سخن مولع كده المفروض العيش هيعلى في حوالي ١٥دقيقه ولونه هيبقي دهبي😋
🌙اخر حاجة kajmak او الكريمة اللي بتتقدم مع الكباب
كمية متساويه من
جبنة ڤيتا
ساور كريم
جبنة كريمي
ونلخبطهم كلهم مع بعض بس كده
