العامية اصلها هيروغليفية

العاميه أصلها هيروغليفية و أسألوا الفول ” المدمس “

مقالنا الجديد مع محررتنا :رحاب الخطيب 

تعالوا أنهاردة أكلمكم عن أشهر الكلمات الهيروغليفية و الى مازلنا بنستخدمها لحد أنهاردة في حياتنا اليومية و أحنا منعرفش أن أصلها من الهيروغليفىه ..
هنبدأ بأشهر الكلمات الى بنتعامل بيها مع بعض في كتير من المواقف ،،

احنا كبرنا و أتربينا علي أن أول ما الدنيا بتمطر بنقول يا مطرة (( رُخى رُخى )) ودى جاية من الكلمة الفرعونية (رُخ) و معناها ينزل , و لما بيجى حد بيخبط على باب البيت بتلقائية جدا بنقول (( مين )) ؟؟ ودى كانت كلمة هيروغليفية الأصل بتتقال على الشخص المجهول , و بنقول كمان على الكبابجي (حَاتي) ودى جاية بردو من الهيروغليفيه من أسم اللحمة (حَات) والعضم كان أسمه ( بَات) و في العامية لما بنلاقى حد بياكل بسرعه و يخلص الأكل بسرعه بنقول عليه ده (نزل علي الاكل حَتتك بَتتك) يعنى مفرقش اللحم ولا العضم , أما الفقير فكان بيتقاله ” حَاتا بَاتا ” يعنى جلد على عضم ,,

ومن الكلمات الى متعلقة بالأكل والى بنستخدمها لحد دلوقتى
في أشهر أكلتنا المصرية الفول و بنقول عليه الفول (المِدَمِس) ومدمس كلمة فرعونية فرعونية الأصل هي (مِتَمِس) أي المدفون و بكدة يبقى الفول المدمس هو الفول المدفون و دى كانت طريقه الطهى .
تعالوا بقى نتكلم عن أشهر الكلمات الفرعونية المستخدمة مع الأطفال و لحد دلوقتى ..
زى مثلا كلمة (( مَم )) وهي في الاصل (موم) ومعناها كل أو خلص أكلك ، و (( أمبو )) و هي في الاصل (أمبمو) وبمعني أشرب و زى كلمة (( وَاوَا )) و دى معناها جرح لما طفل بيتجرح بيقول عندى وَاوَا , كمان كلمة (( بِخ )) و بنستخدمها لتخويف الطفل في الدعابه و معناها عفريت بالهيروغليفيه , كلمة (( بُعبُع )) و الى بنقولها كنايه عن الحاجة الى بتخوفنا أننا شوفناها و معناها بالهيروغليفيه شيطان و كان أصلها الهيروغليفى (( بُوبُو )) , أما بقي لو عايزين نبعد طفل عن مصدر أي حاجة مش نضيفة فبنقولة (( كُخ )) و دى كانت في الهيروغليفيه معناها الشىء المتسخ , و بنقولهم (( بَح )) على الحاجات الى خلصت ودى بردو كلمة فرعونيه .
كلمات كتيرة في الهيروغليفية فضلنا نتوارثها و نحرف في بعضها و منهم الى بيتنطق لحد دلوقتى زى ما هو كدة في كلماتنا العامية وهتفضل دايما تتوارث عبر الأجيال زى كل كنوز أجدادنا الفراعنة عشان كدة كان لازم نلقي الضوء علي أهم الكلمات دى ..