حكايات وخواطرعام
أخر الأخبار

بث مباشر لمحتوي ساخر

بث مباشر لمحتوي ساخر

بث مباشر لمحتوي ساخر

بث مباشر لمحتوي ساخر
بث مباشر لمحتوي ساخر
بث مباشر لمحتوي ساخر
بقلم:فاتن جلال (مامافاتن)
فاتن جلال (ماما فاتن )
فاتن جلال (ماما فاتن )

بث مباشر لمحتوي ساخر غريبة قوي صحيت الصبح فتحت النار ع البراد–اصلي شيلت الغلاية لكهربا علشان بتسحب كهرباء جامداا

وطلعت العيش والجبنة من التلاجة وصليت وقربت من التليفزيون علشان افتحه شوفت نفسي ع الشاشة😳😳 بيجامة البيت وشعري المرفوع اللي لميته اول ماصحيت مابعرفش أنام وحاجة في شعري بتخنق.

وشي مغسول بس لسه أثار النوم مش عاوزة تفارقه 😊فتحت التليفزيون ع المسلسل لقيت التيتر بيبتدي لسه بيستفتح زيي ودخلت المطبخ تاني جهزت صينية الفطار وجبتها في الليفينج بعد مااديت صوت لكل الناس من أوضها يمكن حد يفطر وأنا بشرب النسكافيه لفت انتباهي البطلة وهي صاحية من النوم بتحاول تفوق وبتفتح عيونها ع الرموش اللي مرصوصة كأنها عساكر في طابور عرض لا واحد جاي شمال ولا واحد جاي يمين وحواجب أحلي من شارع لسه متسفلت حالا ومحدش لسه داس علي سواده

طيب وشها ماشي غمضت وفتحت شعرها مين كان واقف جنبها طول الليل كل ما خصلة تغير مسارها يجبرها ترجع لقواعدها سالمة علشان تقوم بالتسريحة دي

ماخدتش بالي م الأحداث ولا مين حضرلها الحمام ومين حضرلها الفطار وفضلت أقول في عقلي تمثيل حضرتك فوقي ده تمثيل

طفيت التلفزيون وقمت انزل اجيب طلبات البيت عادي يعني طول الطريق وانا سايقة قوصة الست الممثلة مش مفارقة خيالي فوقت لما سمعت السيد المحترم السواق في العربية اللي جنبي وهو بيشكر جدا في اللي سمح للستات بالسواقة والخروج و(المرقعه) بالعربيات وكان نفسي اشرحله ان العربية دي مسحولة معايا لمجرد انها بتنتهي بتاء تأنيث مابتبطلش ور طول النهار تقضي مشاوير وتخلص في مهام ومابتروحش الصيانة غير لو تعبت وقالت جاي ووقفت خالص وأولي الأمر حسوا ان طلباتهم متعطلة وصوتي طلع او ابتديت أقول حد يوديني حد يعملي ساعتها بيبقي الخلاص مني في تصليحها هي😏😏😏

روحت البيت وودني بقت في رُكبي حرفياً صوت النشر والنبض من شعيراتي (اه الدوالي والسيلوليت حماكم الله 😂😂😂😂😂 يقطعها الوقفة طول النهار )

لميت الهدوم من الأوض وشغلت الغسالة قولت تأزأز فيهم كده علي مافضالها

عديت قصاد التليفزيون المقفول لقيتني ع الشاشة برضو (البتاع ده ايه حكايته معايا)كل لما أقفله يعاقبني بإنه يعرضني انا ع الشاشة

طيب ياتري بيبثني مباشر كمان ولا حصري ليا هنا🧐🧐

قلعت البندانه مانابقلع الطرحة اول لما بقفل باب الشقة والف شوية علي وضعي قبل مابتدي افوق لنفسي

شوفتني في العرض مرهقة بس مشغولة عيوني فيها حاجات كتير لازم تتعمل ومافيش منها هروب

كل الناس شركاء البيت لما يخلصوا اللي وراهم هايجمعهم نفير الجوع هايدوروا عليا وأول مايشوفوا وشي هايسألوني السؤال التقليدي علشان يطمنوا

لا متقلقوش مش هايطمنوا علي أنا كويسة في عقلهم الباطن والظاهر أنا دايما كويسة

هايطمنوا ع الغدا

ها عاملالنا ايه غدا النهاردة؟

رغم ان الجميع وفي حس واحد امبارح بالليل طلبوا يتغدوا( أي حاجة )ده الصنف اللي الجميع بيحب يطلبه علي الغدا تاني يوم بس مابيحبوش يلاقوه معمول فعلا🤪🤪🤪🤪🤪🤪

 

فتحت التليفزيون بعد ما جهزت ترابيزة الاكل لقيت الحلقة الجديدة من المسلسل بتبتدي والبطلة شكلها خلصت كل اللي وراها (اكيد كل الوقت اللي عدي ده من ساعة الصبح عملت حاجة وخلصتها ولحقت تلبس وتتمكيج وتخرج بقي سايقة عربيتها وبتسمع أغنية فرفوشة كده وواحد قرب بعربيته

ضحكت انا بقي دلوقتي بقي يسمعها نفس الشكر في اللي سمح لنفس الستات يركبوا نفس العربيات ويتمرقعوا

ايه ده ده ما قالش حاجة!!!!

انت يارجل ماهي سايقه اهيه

يابني ادم بتتمرقع اهيه …….. ولا دي مش مرقعه🥴🥴🥴🥴

(هو اللي بيتمرقعوا دول بيعملوا ايه ؟؟؟؟)

كان مفروض أسأل الرجل الفاضل اللي قاللي كده الصبح

والنبي يا خويا المرقعه دي ازاي أحسن حد يسألني معرفش أجاوب إللهي تنسَتر…….ياله ارزاق

خلصت أكل وأنا بقول لنفسي حقها تتفسح وماتفكرش في الناس اللي في البيت هايتغدوا ايه ولا ايه الماركت اللي في المول ده يمكن تاخد منه شوية طلبات تغنيها عن نزول يوم تاني في الحر والرطوبة دي وأكيد الخروجة دي بتكافئ بيها نفسها عن اليوم الطويل اللي اشتغلته وانا قافلة التليفزيون

 

شطبت المطبخ وطلعت الغسيل نشرته الصراحة بقي أتقل فقرة علي قلبي النشر وتطبيق الغسيل ده

وبفرح قوي لوفيه هدوم كتير هاتروح المكواة لأني بلمهم كده هيلا بيلا وابعتهم للمكوجي

خلصت وجبت الشاي في أيدي ورجعت لليفينج

الحمد لله النهاردة يوم شغله قليل من تسعة لتسعة بس ومافيهوش نزول تاني بعد الضهر الله يكون في عون الستات اللي بيشتغلوا كمان وبيقوموا بكل المهام دي مع شغلهم كمان

روحت قصاد التليفزيون اوريله نفسي

شايف يا بايخ خلصت اللي ورايا وحطيت برفان وروج وفكيت الطاقية اللي لفاها لشعري ولابسه فستان بيت شيك ياللي تنشك في قلبك اتفضل صورني وبث بقي وذيع ولا فالح بس تذيع وانا بلبس الشغل وأفارول الامهات

 

عجبني شكلي جوه الشاشة السودا فيه عمق كده في الصورة

ماكنتش عاوزة اشغله علشان صورتي ماتروحش من ع الشاشة بس فتحته عادة زي الإدمان كده

لقيت أخر مشهد في الحلقة اللي ماكملتهاش ع الغدا

والنبي انا تعبت للبطلة دي طول النهار من القناة دي للقناة دي مسافات برضو وكعب عالي واضاءة وإكسسوار وهالومة كده ولا عارفة تفرد ضهرها ولا تكوع شوية

لقيت خير اللهم اجعله خير سي الاستاذ اللفندي بتاعها علي رأي ستي أم أمي عازمها ع العشا في مكان رومانسي والشموع منورة وبيقدملها هدية تعبيرا عن حبه وتقديرا لتعبها معاه (يا مرارررتي)

حتة الكانتلوبة وقفت في زوري بعيد عنكم ماتبلعتش وكنت حاسة إني محتاجة خرطوم المطافي اشرب شوية علشان هافطس والباقي ينزل علي دماغي يبرد السخونية اللي ضربت فيها

وهنا مخي قعد يدور

ياتري ابطل اشوف المسلسل ؟!!

طيب مانا بشوف ده في الواقع كتير ابطل اشوفه هو كمان ازاي؟؟!!

 

اعمل زيها مانمش علشان شعري يفضل مظبوط

ولا اغمض عيني يمكن الحمام والفطار يتحضروا وفي نهاية اليوم الاقيني بتقدر زيها كده

 

ماهو اكيد كل الحاجات هاتلاقي حد غيري يعملها

معقولة الدنيا هاتقف لو انا بطلت اعمل كل حاجة

فكرت كتير ولقيت الحل🤐🤐🤐🤐

 

أنا هاسيب التليفزيون مفتوح طول النهار علشان الشاشة تفضل منورة علشان ماشوفنيش علي مرايتها ابدا وماديهاش فرصة تعرضني ولا تنشرني وتبثني

حل حلو ومريح

اطمنت لقراري وشيلت التوكة اللي ماسكة شعري(مانا قولت قبل كده بتخنق لو فيه حاجة في شعري وانا نايمة)

وشديت الكوفرتة ونمت🤫🤫🤫

بس مش عاوزة أتكلم تاني

Nahed Mohamed

ناهد محمد حسين رئيس مجلس ادارة مجلة زهوة https://zahuaa.com/ وويدينج بلانر وويدينج اكسيسوريس وهدف المجلة هي مجلة أجتماعية عائلية شاملة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى