سماح محمد ابداع في فنون الخرز
فن نول ونسيج الخرز من اجمل واصعب فنون الهاند ميد لانه بيحتاج لدقة واتقان ومجهود
النهاردة معانا فنانة جميلة ابدعت في فنون الخرز وقدرت من الخرز الصغير البسيط انها تخرج تحف فنية سواء اكسسوارات او مفارش او مجسمات
سماح يوسف محمد درست فنون جميله بس للاسف والدها رفض انها تكمل تعليم وكالعاده اتجوزت وقعدت في البيت…
سماح ام لبنت وولدين. هما حياتي كلها والأمل إلي عايشه علشانه…….
**** كلمينا عن موهبتك وازاي اكتشفتيها؟؟؟؟
((انا عاشقه لجميع الأشغال اليدوية ومش صدفه .. امي الله يرحمها كانت بتعرف تشتغل كل فنون الهاندميد … وكنت طفله اقعد جنبها واحاول اتعلم منها ….وكانت ليا صديقه وكانت بتعلمني كل حاجه بحبها ….بعد الجواز زهقت وفكرت اطلع المواهب إلي عندي
وفعلا …..بدأت اخدت حصه واحده في كورس النول والباقي كله من اليوتيوب بجانب فضل ربنا … وطورت من نفسي واخدت كورسات جلد طبيعي وعملت إنتاج مميز .. بس ميولي في الحقيقه لشغل الاكسسورات ….))))
***** ايه هي المشاكل اللي واجهتك ؟؟؟
((((المشاكل إلي بتواجهني انا وكل أصدقائي في الهاندميد طبعا عدم توافر خامات مناسبه لينا …..لو عندنا جزء بسيط من الخامات في الدول الاجنبيه بجد الموضوع كان اختلف تماما ….الايد المصريه مبدعه بالفطره…..بس للاسف . الخامات مش مبتساعدنا ))))
*** ايه هي احلامك وطموحاتك ؟؟؟
(((اتمني اسمي يكبر وشغلي يتعرف في كل مكان ويبقي عندي مشروع كبير …..وفي النهايه اتمني دعواتكم بالتوفيق)))) …
***** ازاي بتسوقي شغللك ؟؟؟
(((بالنسبه للتسويق بيكون أونلاين….والأصحاب والمعارف ….كتير اتعرض عليا شغلي يتعرض في أي بازار للعرض بس انا مش بحب الفكره دي ….)))))
هل بتدي كورسات تعليم ؟؟؟
(((طبعا انا مدربه وعملت دورات كتير في أماكن كتير .. وبعمل دورات أونلاين للناس إلي خارج اسكندريه او داخلها بس مش بيقدروا ينزلوا ……والحمد لله طلع من تحت أيدي ناس مبدعه ويلهم شغلهم الخاص حاليا وفيه منهم بقوا مدربين كمان …..))))
في نهاية حواري مع فنانتنا الجميلة سماح محمد فنانة الخرز
ونتمني لها كل التوفيق
وانتظروني في حوار جديد
دكتورة / مريم سامي
