يوميات مغترب
قصيدة بالعامية المصرية
للأستاذ ممدوح الهندي ، عضو نادي أدب عزبة البرج بمحافظة دمياط والمعروف بلقب – شاعر الغلابة – الحوت
* * * * * * * * * * * * * * *
كتب / ممدوح الهندي من دمياط
(( يوميات مغترب ))
عمال تلف الكون وتروح بلاد و بلاد
وتقول لنفسك إجرى وإجمع ياواد
لجل الولاد قاعد تحوش فلوس
ونسيت تحوش للفلوس دى ولاد .
******************
سافرت بعيد وقُلت
أقدر على بعدك
ومقدرتش
مخدتش أي شيء منك
غير الذكرى والإحساس
وقلب جريح وجرحه غويط
ومش عارف بإيه أداويه
دموعي فى عيني حيرانه
وأنا في بعدك
مليش ولا حضن يأويني
وأرتاح فيه
وعدتك أكون حارس أرضك
وأصون عرضك
مليش حيله أعيش بيها
هعيش ازاي
خرجت أسعى على رزقي
ونفسي أعيش
يابلدي مش وعدتيني
نعيش مع بعض
فين وعدك
خروجي يابلدي خلى الموت
حلي في عنيا من بُعدك
تموت أحاسيسي جوايا
وأموت وأنا حي م الغربة
مفيش يابلدي فرق كبير
بين الغربة و التربة
ما هو الموت حقيقة وجي
أقولك إيه و أعيد لك إيه
ياريتني يابلدي ما سبتك
لا شفت سعادة فى الغربة ،
ولا كسبتك
ساعات !!! بتشدني الذكرى
لأيام الشتا الباردة على نيلك
وصحبتنا أما كنا شباب
بنتمنى يطول ليلك
يابلدي زلني بعدك
مش الغربة اللي زلتني
كتير قلت ياواد إرجع
لو أعرف زُلي فى بعادك
يا بلدي كنت خليتني
أنا فى بعدك وحيد منفي
في كون تاني
معايا دولارات وبرضه فقير
معايا أصحاب و وحداني
بعيش في الغربة بالأيام
ولا أسمع صوت يناديني
وأخاف من حاجه تحصل لي
ملقاش ناس توديني
أنا دلوقتي لما أضحك
بحس بغش
لأن الضحكة بهتانه
ومن ع الوش
قوليلي أرجع لبيتنا ازاي؟
وأنا أرجع
بلمسة حب يابلدي تضميني
بعيشة وكام جنيه وبسمة
يابلدي طبطب عليا
ساعة ما تشوفي دمعه
حزينه في عنيا
بإيد تشفي ومعروقة وعرقانة
لكن مليانه حنيه
انتي يابلدي جوايا
حياتي وكل يوم عشته
و إذا كنا إفترقنا في يوم
هيجي اليوم ونتقابل
وأكحل عيني بترابك
وأعيش حارس على بابك
وما هسبكيش
لا يمكن أعيش
بعيد عنك
لا يمكن أعيش .
شاعرالغلابة
قصيدة بالعامية المصرية
* * * * * * * * * * * * * * *
