عام
أخر الأخبار

القهوة وما فيها الحلقة الثالثة

القهوة وما فيها الحلقة الثالثة

حلقات مسلسلة لعشاق الجمال الاسمر الملقب بالقهوة

بقلم : مها بدوي

صباح السعادة والهنا على أصحاب المزاج …. صباح الخير على عشاق الجمال الأسمر الملقب بالقهوة …. يا سلااام على فنجان القهوة المظبوط اللي اول ما نمسكه ونقربه مننا نلاقي سحر الرائحة الجميلة … انطلق واتسلل على المناخيرويوصل بتاثيره العجيب على خلايا المخ … وفجأة يظهر شعور سعادة يلف البني آدم لف …

وتبدأ رحلة المتعة مع اول شفطة من الفنجان

فنجان القهوة بتاع كل واحد مرتبط بيه شخصيا … كل واحد وفنجانه وقهوته خاصة بيه جزء منه … حقيقي ممكن نعتبرها الممثل الرسمي ليه

زي ما شرحنا كل حاجه تخص فنجان القهوة تفضل نقطه اخيره وهي حلاوة الفنجان وهنا المقصود كمية السكر في الفنجان

…. فؤاد افندي دخل يقيل شويه بعد الغدا … وصحي بعديها بساعة … اول ما قام … خرج من الأوضة… لمح الست ازهار مراته قاعده على الكنبة في الصالة ومشيشه الشباك وقاعده تبص على اللي رايح واللي جاي في الشارع … حاطه قدامها عدة القهوة اللي بتلمع لما شعاع الشمس ينعكس على النحاس بتاعها … ايوه يا ازهار …. جهزي القهوة بتاعك بسرعة لأحسن انا مستعجل عندي مشوار وماينفعش انزل من غير ما اشرب فنجان من ايديكي الحلوين دول …. ضحكت الست ازهار وقالته… نوم العواف يا فؤاد …. حالا اجهزهالك… مسافة ما تخرج من الحمام … ربنا يخليك لينا وما يحرمناش منك …. ولعت السبرتايه جابت المايه الساقعه وحطت شوية سكر يادوبك على طرف المعلقة ودوبتهم كويس وحطت البن وحطت الكنكه على النار …. ورصت فنجانين … وتأكدت انهم زي الفل وريحتهم حلوة بعد ما قالت للبت زكية تمسح حلق الفنجان…. بماية ورد من اللي في الازازة الحمرا اللي في دولاب الفضية …. استوت القهوة وبتنزلهامن على النار لمحت فؤاد خارج من الحمام …. تعال …. تعال اقعد في ريحي.. .. فنجانك جاهز يا سي فؤاد … قعد جنبها فؤاد …. وشرب اول شفطه من الفنجان … داق طعم حلاوة ماية الورد مخلوطه مع القهوة اللي ع الريحة ….. الله يا ازهار …. تسلم ايدك … احلى فنجان قهوة اشربه … انما ايه …. انت ماسحه الفنجان بايديكي الحلوين دول … انا دايق ورد في القهوة …. احمر وش ازهار وقالتله …. تسلم يا سي فؤاد ربنا يخليك ليا وما يحرمنيش من كلامك الحلو ده …. خلص فؤاد القهوة بتاعته ونزل يقابل …. شوقي وكمال وحسن صحابه . .. على القهوة بتاعت المعلم جابر …. السلام عليكم ازيكم …. اهلا اهلا يا فؤاد …. اتبرع كمال صاحبه انه يسقف للواد شعبان … ماركجي القهوة … ايوه ماركجي … هو اللي معاه مركات المشاريب … كل مشروب وليه مرك لون حسب قيمة المشروب …. علشان وقت دفع الحساب كل واحد يعرف هيدفع كام …. المرك الأصفر قرشين صاغ … المرك الأخضر تلات تعريفه …. وهكذا

ايوه جااااي…. زعق الواد شعبان … قبل ما يوصل عندهم …. ايوه يا فؤاد افندي …. تشرب ايه …. قهوة مانو يابني … ورد كمال انا كمان واحدة سكر زيادة … اما شوقي فطلب قهوته المعتادة …. وسمعوا شعبان بصوته الجهوري بيقول عندك واحد قهوة حزايني وواحدة مانو وواحدة سرياقوسي للافنديات هنا …. وبحركة لااراديه مسح الطربيزة بالفوطه اللي في ايده لاجل يلمعهامن اي تراب … نزلت المشاريب وبدأت الحكاوي بين الافنديات …. قبل ما يدفعواالحساب وكل واحد يروح للبيت والعيال

الملحوظ يا سادة ان اسامي القهوة مرتبطه بكمية السكر اللي في الفنجان … منها الحزايني او الاسكتو وده اسم القهوة اللي من غير سكر خالص … واتسمت حزايني لارتباطها بالمياتم اللي بتقدم قهوة سادة …. وفي اللي على الريحة والمانو دي بقى ما بين المظبوط واللي على الريحة وفي الاخر تيجي الزيادة او السرياقوسي… اللي تسمت كده عشان بتبقى حلوة قوي زي العسل والسرياقوسي…. دارت الايام ولفت … وظهرت أنواع كتير من القهوة اللي بالحليب واللي بغيره …. ان شاء الله بكرة …. نقلب ع القهاوي الإفرنجي وأنواع القهوة عندهم

طولت عليكم في الكلام … بس بصراحة قعدتكم ما ينملش منها …. قولولي امشي بقى عندك شغل … فوتكوا بعافيه

القهوة وما فيها الحلقة الثالثة
القهوة وما فيها الحلقة الثالثة

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى