المقلوبة بقلم / مي هندي
يقال ان زمان كان اسمها باذنجانية وبعدين اتغير للمقلوبة علشان بقت تتعمل بمكونات تانيه كمان، وفي اقوال اخري ان في يوم فتح القدس ودخول صلاح الدين الايوبي واحتفالا بالنصر قام اهل مدينة القدس بتقديم الباذنجانية لهم فعجبتهم وسألهم صلاح الدين ما هذه الاكله المقلوبة لانها كانت بتتقلب في طبق التقديم امام الضيوف ومن هنا اصبح اسمها مقلوبة..اي الحكايات صحيحه؟ الله اعلم المهم اننا هناكل مقلوبة انهارده
كيلو لحم
٣ وحدات باذنجان شرايح سميكة بالطول
٢ بطاطس حلقات
٢ طماطم حلقات
م ك بهارات مشكله
م ك كركم
م ص قرفه، كزبره، و رشة حبهان
ملح فلفل
زيت
صنوبر للتزيين
لسلق اللحمه هنحتاج بصله ورق لورا حبهان مستكه عود قرفه
اول حاجة هنحضر اللحمه نتبلتها بملح وفلفل ونشوحها مع عود قرفه وورق لورا وحبهان ومستكه ، نخلط البهارات كلها سوا وناخد منها معلقة علي اللحمه وهي بتتشوح نزود ميه ونسيب اللحمه تستوي..
هنقطع الباذنجان شرايح طويله وسمكية علشان تستحمل معانا، ونقليها في الزيت وبعدها نقلي حلقات البطاطس..
نجيب بقي الحله نرص حلقات الطماطم ونرص الباذنجان علي جوانب الحله وطبقه فوق الطماطم وبعدين طبقة بطاطس..وبعدين اللحمه ،ننقع الرز نص ساعه بعدها نصفيه ونلخبط عليه معلقة كبيره من خلطة التوابل اللي عملناها الاول، ننزل الرز ونوزعه كويس وبعدين نضيف شوربة اللحمه لحد ما تغطي الرز نسيبه علي نار متوسطة لحد ما يغلي ويتشرب نوطي النار ونسيبها لحد ما يستوي وبالهنا
