القهوة وما فيها الحلقة الرابعة
حلقات مسلسلة لعشاق الجمال الاسمر الملقب بالقهوة
صباح السعادة والهنا على الحلوين … صباحكوا هادي ونادي بإذن الله… صباحكوا قهوة مضبوطه تعدل المزاااج
يرجع مرجوعنا للقهوة وجمالها …. القهوة زمان كانت كل أنواعها موجودة بس كل مكان وليه زبونه…. القهوة اللي كانت بتتقدم في القهوة البلدي هي القهوة التركي بحلاوتها وجمالها … لكن كان في أماكن تانيه ليها قهاوي خاصة بيها …
كمال قاعد في الشغل مع فؤاد افندي … وقاله… ايه رايكم أعزمكم على قهوة ريتش …. رد عليه فؤاد …. نعم يا كمال … هو انت هتترسم علينا اكمنك ابن زوات ومن سكان جاردن سيتي …. رد كمال بعد ضحكته السينمائيه اللي متعودين عليها …. ها ها ها … لا يا فؤاد بس عايز ادوقك قهوة جديدة شريتها امبارح انما ايه …. معتبرة … عمرك سمعت القهوة يتحط عليها لبن حليب …. رد فؤاد بنبرة سخريه … ودي تبقى قهوة ازاي … دي تبقى متنكرةفي شكل شاي بحليب ….. ضحك شوقي ضحكته العاليه اللي تلم عليهم خلق الله …. رد كمال … قاله اسمع بس تعال وجرب ولو ما عجبتكش… احتسب انا يا سيدي وامري لله
خرج فؤاد من الشغل بعد ما اتفق مع اصحابه ان التلاقي عند بيت كمال … ويتمشوا شويه لغاية القهوة اللي قال عليها كمال …. وصل فؤاد البيت واتغدى …وهو داخل يقيل زي عادته … قال لازهار…. صحيني ياازهار على الساعة ٤ كده لأحسن عندي مشوار … وابقى اندهي الست إصلاح تشرب معاكي القهوة بعد ما انزل … اتغيرت ملامح ازهار … وقالت ماشي يا سي فؤاد … هو انت مش هتشرب معانا القهوة ليه كافا الله الشر .. انت زعلان مننا فحاجه… ضحك فؤاد وقال … ازعل منك انت يا ست الكل ازاي بس … لا ابدا اصل كمال افندي عازمنا على قهوة …. قال ايه هنشرب سوا قهوة بالحليب … ضحك ازهار ضحكة مخلوطة بنوع من الدهشة والاستنكار … وقالت قهوة عليها حليب … والنبي يا سي فؤاد لو مش على هواك ما تشربها لتوجع بطنك يا اخويا…. فرح فؤاد وحس بحب ازهار ليه … رد وقال حاضر ربنا يخليكي ليا وما يحرمني منك … تسلم وتعيش يا سي فؤاد …. نزل فؤاد وقابل كمال وأصحابه وراحوا قهوة ريتش … مكان فخيم غير قهوة المعلم جابر … كل حاجه بتلمع وريحة حلوة في الجو وصبي صغير اسمر جميل لابس قفطان احمر وطربوش احمر فتح له الباب … قعدوا على الطاولة ولسه شوقي هيسقف… كمال قاله … لا هنا حاجه تاني … دلوقت حد يجي … جالهم شاب وسيم لابس قميص وبنطلون ولا الافنديه وعليهم مريلة بيضا زي الفل … قال انشنتى يا افندم … حضرتك تامرني بايه… قاله كمال بعد اذنك اتنين قهوة فرنساوي … قالوا حاضر … ومشي … علق فؤاد قاله هي هنا القهوة على حسب العلام … ضحك كمال وقاله لا … هنا في قهوة طالياني وقهوة فرنساوي وقهوة بالشوكولاتة وحاجات تاني خالص
من هنا نعرف ان القهاوي الاجنبية موجودة في مصر من زمان … مع دخول الاجانب اشي الطلياني على الجريجي على والفرنساوي كل واحد جه وجاب المزاج بتاعه معاه …. الطلياني كان يحب القهوة المتركزة الغامقة المعروفة بالاكسبرسو…. والفرنساوي دي القهوة اللي عليها حليب ودي كانت درجات منها اللاتيه ومنها الكابتشينو ومنها البيضا
وكانت القهاوي الإفرنجي موجودة غالبا في مناطق تواجد الاجانب … زي قهوة ماتتيا وقهوة ريتش وجروبي وقهوة توبار وكانوا غالبا في منطقة وسط البلد وعابدين اكتر من سيتي
بكرة ان شاء الله نعرف الفروق بين الأنواع المختلفة والسبب في تغير الأنواع راجع لنسبة الحليب المخلوط مع القهوة
طولت عليكم في الكلام … بس قعدتكم ما ينملش منها… قولي امشي وراكي شغل …. سلامو عليكو اشوفكم بكرة ان شاء الله
