عام
أخر الأخبار

القهوة وما فيها الحلقة الخامسة

 

 

القهوة وما فيها الحلقة الخامسة

بقلم / مها بدوي

حلقات مسلسلة لعشاق الجمال الاسمر الملقب بالقهوة

 

مساء السعادة والهنا ….مساء الجمال … مساءكم هادي ونادي بإذن الله … مساءكم قهوة مضبوطة تعدل المزاج

 

من المعلوم يا سادة ان اصحاب المزاج العالي ليهم طقوسهم الخاصة المرتبطة بفنجان القهوة بتاعهم …. منهم اللي ما يعرفش يشرب القهوة الا وهو ماسك كتاب او رواية يقلب صفحاتها … او ماسك في ايده قلم وبيكتب احلى كلام مليان مشاعر واحاسيس … ومنهم اللي يشرب القهوة ومعاها حاجه حلوة مسكرة معاها … ومنهم اللي وقت القهوة بالنسبة له … انه يسرح في ملكوت الله … يغازل الشجر … ويغني للزهور … ويعمل علاقات صداقة مع الطيور ….

الست ازهار والست إصلاح قاعدين مع بعض فاتحين الراديو على حفلة الست …وااآخر سلطنه… و في وسط الاغنية سمعوا خبط خفيف على الباب .. قامت ازهار فتحت الباب … شافت جارتهم اللي في الدور الثالث الست تينا الجريجيه مرات الخواجه خرستو صاحب محل البقاله اللي على الناصيه واقفه … اهلا اهلا يا ست تينا اتفضلي … دخلت تينا وهي شايله كنكه كبيرة بايد طويلة نحاس بتلمع في ايد وفي الايد التانيه طبق متغطي بمنديل كاروهات احمر فابيض…. وهالل منه ريحة زبده حلوة جميله …. دخلت تينا ولسه هتسالها ازهار تشرب ايه … لحقتها في الكلام وقالت … عملت شوية كرواسون وقهوة جريجي انما لزوم السهرة مع الست …. تنحت إصلاح وقالت … عليكم اسامي يا ست تينا عجيبه … كرساسون ايه بس وقهوة ايه بعد العشا دي …. ضحكت تينا وقالت كرواسون يا إصلاح.. دوقي بس انت الاول ونشوف رايك …وبعدين القهوة الجريجي دي ما تسهرش دي مغلية يعني من غير وش

صبت تينا القهوة في الفناجين وحطتها في الطبق بتاعها وطلعت حاجه كده ملفوفه على بعضها لونها دهبي جميل وريحتها قالبه الشقة … فيها ريحة زبده على شوية مكسرات …. قطمت ازهار منها قطمه… حسن بهوا دافي خرج من العجين وريحة بندق على زبدة دخلت مناخيرها… وسكر محلي بقها…. تسلم ايدك يا ست تينا …. حلو اوي … تسلم ايديكي … لابد في يوم تقوليلي طريقتها لأجل اعملها للافندي بتاعي … مسكت فنجان القهوة وبصت عليه باستغراب وقالت هي قهوتكوا الجريجي دي من غير وش كده يا تينا … ردت تينا قالت لها ايوه دوقي بس … شفطت شفطه … حست بطعم الحبهان والبن في بقها …علقت وقالت حلوة وطعمه … بس ما تعدلش الدماغ زي قهوتنا…. تسلم ايديكي يا تينا … النوبه الجايه اعملي انت البتاع ده هو وخلينا احنا نعمل القهوة … اصلنا ولاد عرب مش واخدين على شغل الخواجات ده … ضحكت الستات التلاته وكملوا سماع اغنية الست بعد من الراحة خلصت وبدأت الوصلة التانية

من المعلوم يا سادة ان القهوة الجريجي كانت منتشرة في الأحياء اللي فيها جريج كتير … وكانت بتتقدم دايما مع حاجه حلوة إيشي بسكوته حتة كرواسون اي حاجه مسكرة … القهوة الجريجي بتتعمل على النار تغلي الاول وتقلب وتترفع من على النار شوية تهدى … وبعدين تنزل على النار تاني وتقلب وتترفع من على النار ويتكرر الكلام ده اكتر من مره لغاية ما يعمل رغوة نحافظ عليها … تتصب في الفنجان وتتقدم .. القهوة الجريجي بتبقى درجة حلاوتها عاليه معلقتين سكر للفنجان … وممكن تتقدم من غير سكر خالص … الجريج الاصليين متعودين يشربوا القهوة ويشفطوها بصوت عالي … وبراحة على مهلهم

القهوة وما فيها الحلقة الخامسة
القهوة وما فيها الحلقة الخامسة

خلاصة القول يا سادة القهوة الجريجي شبه القهوة التركي بس من غير وش

بكرة نعمل مع بعض شوية قهوة طالياني اسبرسو ومشتقاتها الحديثة من كابتشينو على لاتيه على فلات وايت … على فرابتشينو

خلص الكلام النهاردة بس اشوفكم بكرة ان شاء الله… رغيت كتير ووجعت دماغكم …. قولولي امشي وراكي شغل … فوتكوا بعافيه

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى