القهوة وما فيها الحلقة السادسة
بقلم / مها بدوي
حلقات مسلسلة لعشاق الجمال الاسمر الملقب بالقهوة
صباح السعادة والهنا …. بعد الحكاوي الكتير عن القهوة وحلاوتها … زاد ارتباط الناس بالقهوة مع مرور الزمن وخصوصا بعد ما بقى في منها اشكال والوان كتير منها السخن ومنها البارد … منها اللي بقى بتتشرب اول اليوم ومنها اللي يعتبر نوع من الحلويات ….
رجع فؤاد افندي من المصلحة … ودخل البيت …. ريحة طشة الملوخية كان شاممها من على السلم …. ولما دخل شقته اتاكد انها من عندهم … ملأ صدره من هوا البيت المعطر بريحة الملوخية وهو متاكد ان مدام في ملوخية يبقى الموضوع فيه زفر وغالبا انارب زي ما بتقولها الست ازهار … علا صوته شويه وقال السلامو عليكو…. شاف الست ازهار جايه عليه من المطبخ وبتقوله…. انت وصلت يا فؤاد افندي … خش طس وشك بشوية مايه وعلى ما تغير وتلبس جلبيتك… هيكون الغدا جاهز …. لبس فؤاد الجلبيه .. وهو خارج لقى ازهار يتحط العيش …. قالها ايه الروايح الحلوة دي … تسلم ايديكي …. جهزي نفسك بقى بعد الغدا … ننزل شويه نتمشى .. هنقعد سوا في مكان حلو قالي عليه كمال صاحبي … ردت ازهار وهي مبتسمة من فرحتها … تسلمي لي يا سي فؤاد والله كنت عايزه اطلب منك بس مكسوفه اصلي بقالي جمعتين ما نزلتش من البيت … قلها… خلاص اهي جت لغاية عندك ياستي … ضحكوا الاتنين وبداوا في اكل الغدا … وبعد ما خلصوا … دخلت الست ازهار تجهز نفسها … خرجت من الأوضة وهي لابسه فستان احمر جميل منقوش بورد ابيض صغير وحاطه في وسطها حزام اسود عريض ماشي مع الشنطه والجزمه اللي لبساهم…. بص لها فؤاد وقال ايه الالاجه دي يا ازهار … احمر وشها وقالت دي عيونك الحلوة يا سي فؤاد … خرجوا الاتنين وسبق فؤاد شويه لأجل يوقف حنطور… ركبوا الحنطور وقال فؤاد ميدان طلعت حرب يا اسطى …. مشيوا بالحنطور وهما عمالين يحكوا عن أحداث اليوم لبعض … فؤاد قال على جنب هنا اسطى ونزل فؤاد وازهار على مدخل جروبي… دخلوا المحل … حست ازهار انها اتنقلت إلى عالم آخر غير اللي هي متعودة عليه … بس كانت حاسه انها في روايه من الروايات … كل حاجه حواليها بتلمع وشكلها جميل حتى الولد اللي فتح لهم البوابه.. حست انه لسه جاي من عند المكوجي هدومه نظيفه ومكويه…. صوت موسيقى حلوة جدا شغاله في المكان …. قعدت على الطربيزة … وقالها فؤاد ها يا ست الكل تشربي ايه … مسكت المنيو في ايدها وقعدت تقلب فيه … وقالت … اختارلي انت يا سي فؤاد هو انا هافهم احسن منك …. اي حاجه منك حلوة … ضحك فؤاد … وطلب الجرسون… جاله وقاله … وي مسيو…. قاله انا عايز اتنين قهوة طالياني باللبن … ومعاهم ايس كريم …. رد وقاله تحت امرك يا افندم … اي أوامر تانيه … قاله لا شكرا … سالت ازهار باستغراب … هو ايه البتاع اللي انت طلبته يا سي فؤاد ده … رد وقال بعد ما نفش ريشه على الاخر استعدادا للمعلومة الجديدة اللي هيقولها … أاااه قصدك الايس كريم … ده حاجه شبه الداندورمه كده بس ايه خواجاتي… جه الجرسون وحط قدام فؤاد افندي والست ازهار فنجانين شاي شفافين باين منهم مشروب سخن لونه شبه الشاي بحليب بس اغمق شويه وعليه طبقة رغاوي كده شبه الصابون ومعاهم طبق فيه حاجه مدورة بيضا عليها فتافيت صغيره ريحتها زي البندق وعليها حاجه سايحه لونها بني فاتح …. داقت ازهار الحاجه البيضا بطرف المعلقه… وحست بطعم مسكر ساقع وريحة بندق وفسدق الاتنين مع بعض … قالت حلو اوي ده يا سي فؤاد … وفي نفس الوقت كان فؤاد بيقرب الفنجان من بقه وهو شامم ريحة بن قويه ويشفط شفطه من الفنجان … دخل في بقه شويه من الرغوة اللي على وش الفنجان مع شوية من المشروب …. داق طعم جميل قهوة و معاها لبن و معاها حاجه تالته مش عارف ايه هي بس حس بإحساس حلو دخل على مخه وريح اعصابه في ثانيه … سال الجرسون قاله ده كابتشينو ومعاه شوكولاته يا بيه … خلص فؤاد وازهار قعدتهم…. ودفعوا الحساب وخرجوا من الباب وهما الاتنين حاسين انهم كانوا في عالم تاني غير العالم اللي هما عايشين فيه … كانت القهاوي الإفرنجي منتشرة في وسط البلد زي جروبي والامريكين واكسيلسيور وغيرهم .. اللي كانوا مشهورين بكل حاجه جديدة في عالم المشروبات والحلويات واللي دخلوا الجاتوهات والمربات بمختلف أنواعها لمصر
خلاصة القول يا سادة ان القهوة الطلياني هي القهوة الاسبرسو… اللي بتتعمل بأن احنا نمرر المايه السخنه بشكل سريع الاندفاع بين مطحون البن الشبه ناعم علشان يخرج من الناحية التانيه خلاص صغيره للقهوة مركزة بشكل جامد جدا .ودي الفكرة الاساسيه اللي بيشتغل عليها كل اجهزة القهوة الاوروبيه …زي الموكابوت وماكينات الاسبرسو … ممكن تتشرب كده لوحدها وممكن نضيف عليها إضافات كتير زي اللبن وبنسب مختلفة يعني الكابتشينو بيبقى النسبة القهوة زي نسبة اللبن زي كمية رغوة اللبن او المعروفة حاليا بالفوم وفي ناس بنرش عليه شوية كاكاو اما الموكا بتبقى نسبة اللبن اكتر من القهوة وبيكون معاها شوكولاته سخنه ..اما اللاتيه بيبقى اللبن ضعفين القهوة ومعاهم طبقة خفيفة من فوم اللبن ….وفي الافوجاتو ودي عبارة عن بولة ايس كريم فانيليا ويتصب عليها الاسبرسو وتتقدم في الحال ….من هنا نلاحظ أن القهوة الطلياني … تعتبر الأساس لعدد كبير من المشروبات الساخنه و الباردة اللي كلنا بتحبها…. بكرة ان شاء الله هنعرف اكتر عن طرق تحضير المشروبات اللي بتدخل فيها القهوة … طولت عليكم بس بصراحة قعدتكم ما ينملش منها …قوليلي كفايه كده روحي بقى وراكي شغل … اشوفكوا بكرة ان شاء الله … فوتكوا بعافيه
