القهوة وما فيها الحلقة الثامنه
بقلم / مها بدوي
حلقات مسلسلة لعشاق الجمال الاسمر الملقب بالقهوة
صباح الجمال على عشاق الجمال … القهوة عالم كبير وحويط مليان حكاوي فيه اللي غاوي وفيه اللي هاوي فيه اللي قاعد جنب اللي هايم وفيه تلاهي وفيه عبر وفيه تلاقي كل البشر …
زي ما قولنا يا سادة القهوة دخلت في حاجات كتير حلو ساقع وسخن …… الجديد بقى يا ساده انها كمااان دخلت في الحوادق …ايشي شوية صوص يتحط جنب اللحمه المشوية والخضار وايشي تتبيلة نتبل بيها الفراخ واللحمه قبل الشوي… وايشي لحمه مفرومة بالخضار متسبكة في طماطم مع قهوة وشطه…. عالم كبييير
رجع فؤاد افندي من شغله وقبل ما يدخل باب العمارة بص بعينه فوق كده لقى ازهار واقفه مواربه الشيش وبتبص عليه واول ما عينها جت في عينه ضحكت ودخلت جوه تفتح له الباب …. حمدلله ع السلامه يا سي فؤاد …هاحضرلك الغدا حالا … رد وقال اه والنبي يا ازهار لأحسن انا واقع من الجوع … طبخالنا ايه النهاردة …. ردت وقالت … عملتلك دقية بامية باللحم الضاني… عرفاك بتحبها … سمعت صوت فؤاد من جوا الأوضة وهو بيقول سيدي يا سيدي … انا قاعد النهاردة في البيت ناكل ونشرب القهوة سوا … آه بالحق كنت هنسى… بكرة الصبح هابعتلك عم صالح بالحنطور … لأجل ياخدك عند الست منى حرم كمال … اصلها عزماكي على يوم الزيارة بتاعها … استغربت ازهار وقالت… ليه يا فؤاد افندي … قالها … اصل كمال صاحبي قالي ان الست بتاعته عزماكي في بيتهم تقعدوا سوا وتتسامروا… روحي غيري جو …ردت ازهار وهي مبسوطة وحاسة انها بقت من اولاد الذوات اللي انت تشوفه يا سي فؤاد … اكلت ازهار وفؤاد الباميه…. وقعدوا سوا يتسامروا ويحكوا لبعض عن يومهم مشيت الست ازهار لغاية السفرة وجابت الصينية النحاس اللي عليها السبرتاية والكنكة وبرطمان البن المحوج …. قعدت ع الكنبة في ريح فؤاد افندي وولعت السبرتاية …. صبت الماية في الكنكة … ودوبت فيها معلقتين تلقيمه بن ويدوبك ربع معلقة سكر وقعدت تقلب وقالت … حقه يا سي فؤاد … ايه حكاية عزومة بكرة دي … بصلها فؤاد وقالها … بصي يا ستي … الهوانم اللي ساكنين في جاردن سيتي … عملين اتفاقيه بينهم وبين بعض كده … إن كل يوم واحدة تفتح بيتها للستات… يتجمعوا … يتشاوروا ويتكلموا في مواضيع كتير … ايشي موضة … على أكل… على تعارف عائلات .. الهوانم تشوف الهوانم الصغيرين وتخطب منهم لأولادهم… يقعدوا ويتفقوا ويسيبوا الكلام النهائي للرجالة … قعدات ستات يعني … قالت ازهار وهي بتناول فنجان القهوة لفؤاد افندي …. بس كده يا سي فؤاد يلحقوا يعملوا شغل البيوت امتى … ضحك فؤاد وقالها …. شغل بيت ايه بس … دول هوانم يعني كل بيت فيه خدم يقوموا بشغل البيت … بس سيبك انت … فنجان القهوة من ايدك ده … ايه شهد مكرر … تسلم ايديكي الحلوين دول ومسك ايدها وباسها … حسيت ازهار ان قلبها بيرقص من الفرحة وان احساسها بالسعادة مالي عليها دنيتها
تاني يوم الصبح … لبست ازهار فستانها النبيتي ابو ياقة دانتيل اسود ومسكت معاه شنطتها السودة الفيرنيه مع جزمتها الفيرنيه ونزلت الحنطور… وصلت عند بيت كمال … ودخلت لقت الهوانم قاعدين في الجنينة على تربيزة طويلة… فساتين أشكال وألوان… وضحك عالي … وموسيقى خفيفة شغالة من الجرامافون … وعلى الجنب واقف سفرجي مع طباخ … بيشوى لحمه وخضار واول ما دخلت ازهار نادتها منى وقالت لها شرفتيني يا ازهار وقعدتها جنبها … وبدأت حكاوي الهوانم كلهم يحكوا عن نفسهم وحياتهم … وبالرغم من بساطة ازهار في الكلام الا ان كل الهوانم اتعلقوا بيها وبكلامها اصلها متعلمة و معاها شهادة الثقافه … وكانت بتحب تقرا كتير … وفوسط الكلام … بدا السفرجي يرص الأطباق الصيني وعليها اللحمة المشوية وشوية خضار … ومعاهم شوية صوص كده لونه بني فاتح … وبدأت الهوانم تاكل وهي معجبة بالطعم… ازهار حطت حتة لحمه في بقها عليها لحسة من الصوص… حست بطعم جميل حادق شوية على طعم توم … وشوية قهوة … ايوه … ده طعم قهوة انا متاكده … ميلت على منى وسالتها… الصوص ده في قهوة يا ست منى … ردت منى وهي مبهورة ايوة … ده فيه قهوة … ما شاء الله عليكي … عرفتي الطعم كده على طول … واضح انك شاطرة قوي يا ازهار … اصل الشيف اللي عندنا جاي من فرنسا ودي وصفة اتعلمها هناك … كملت ازهار الاكل وهي معجبة بالطعم الجديد ده وكانت مبسوطة انها عرفت الطعم على طول … كملت ازهار الزيارة ورجعت البيت وقعدت تحكي مع فؤاد عن كل حاجه حصلت او شافتها هناك وهي مبهورة بالحياة الارستقراطية اللي عايشه فيها منى … بس في نفس الوقت حاسة من جواها ان حياتها في حي الأزهر احلى واجمل حياة ممكن تعيشها
من هنا يا سادة نعرف ان القهوة بقى ليها بصمتها في الاكل الحادق زي الحلو بالضبط…. ظهرت تتبيلات للحمه تدخل فيها القهوة وصوصات معمولة من القهوة وبسكوتات حوادق بيدخل فيها القهوة … ده بالاضافة لعيش مشهور جدا في اوروبا معروف باسم الباباروتي بيكون عليه طبقة مقرمشة من بره داخل فيها القهوة وناس كتير بيحطوا القهوة جوا العجين ..
آخر الكلام … طولت عليكم … قولولي روحي شوفي اللي وراكي … فوتكوا بعافيه
