لقمة القاضي
أكلة وحدوتة
بقلم/ مها بدوي
صباح الجمال … صباح السعادة…. صباحكوا هادي ونادي بإذن الله…. صباحكوا قهوة مضبوطه تعدل المزاااج ☕️❤️☕️❤️
طول عمرنا بنحن لأيام زمان وحلاوتها وذكرياتها وتفاصيلها الصغيرة اللي كانت بتعدي علينا ترسم ضحكة وبسمه على الوشوش وتسيب في القلب علامة وضحكة مجلجلة ….
رمضان أيامه كانت ليها طعم خاص وريحة جميلة …. من اول ما يستطلعوا الهلال وتبدأ الحركة تدب في الشوارع … انوار تزين الشوارع ومداخل العمارات وأغاني رمضان تشتغل في الإذاعة والمحلات …
وتبدأ الناس تجري تجيب شوية فول على كام علبة زبادي وعيش طازة …
ويبدأ المسحراتي يلف في الشوارع ينقر على طبلته وينادي اسامي العيال … المسلمين والمسيحين وكله يضحك ويزقطط لما يسمع اسمه ….
وتتلم العيلة على السفرة وقت السحور وحلقة المسحراتي لسيد مكاوي شغالة في التلفزيون (انا شغلتي مسحراتي في البلد دوار)
صحيت الست ازهار من بدري …. تنظف شويه مع البت زكية وتروق …. تفتح الشبابيك وتنور البيت … تهوي البيت وتبخره… وتسمع في الراديو تمثلية الدنيا على جناح يمامه … وتستنى تسمع اغاني رمضان … ابتهالات وتواشيح نصر الدين طوبار وتلاوة عبد الباسط في الإذاعة….
وفي وسط الكلام ده … سمعت رجلين فؤاد افندي طالع على السلم … جريت بسرعة تفتح الباب … وهي وشها متغير … وقبل ما يدخل فؤاد افندي سالته …. خير يا سي فؤاد … مش عوايدك راجع بدري ليه …. ضحك فؤاد افندي وقلها …. كل سنة وانت طيبه يا ازهار النهاردة اول يوم رمضان … ما انتي عارفة بيمشونا ساعة بدري عن مواعيد الشغل العاديه ….
قلت آجي اساعد معاكي في الفطار … ما انا عارف انك صايمه وزي عوايدك هتجمعينا كلنا حواليكي النهاردة … اهه ايد على ايد تساعد …
يا الله يا ستي قوليلي عايزاني اعمل معاكي ايه …. ضحكت الست ازهار وقالته … ربنا يخليك ليا يا سي فؤاد ولا يحرمني من حنيتك عليا …
دخلت الست ازهار ومعاها سي فؤاد المطبخ … لاجل يحضروا الفطار … عارفة يا ازهار … انا نفسي في شوية لقمة القاضي من ايديكي الحلوين دول … يا سلام عليها وهي بتقرمش في البق كده وهي متغرقة بالشربات اللي مليان ماية ورد وعليها شوية مكسرات … يا عيني وجنبها فنجان قهوة انما ايه … ضحكت الست ازهار وقاليتله …. من عينيا يا سي فؤاد …
حالا اعجنها واسيبها تخمر …
المهم جهزت الست ازهار مقاديرها (جابت ٣ كوبايات دقيق وحطيت عليهم ٥ معالق نشا ومعلقة خميرة كبيرة ومعلقة سكر كبيرة ومعلقة بيكنج باودر … خلطتهم مع بعض وفي طبق تاني حطت كوباية ونص مايه دافيه وعليهم علبة زبادي … و٣ معالق زيت…. خلطيتهم سوا … وزودتهم على الدقيق وقلبتهم كلهم وسابتهم يخمروا ساعة قولي ساعة ونص)
وعملت شوية شربات تقيل كوبايتين سكر عليهم كوباية مايه ومعلقتين ماية ورد وحطيتهم على النار واول ما غليت عصرة عليهم نص لمونة وسابيته لغاية ما تقل كده … بعد العجين ما خمر كويس … بدأ تقلي لقمة القاضي في زيت كتير وتطلعهم بعد ما يحمروا
عدى الوقت بسرعة …. وبدأ الحبايب في الوصول …. الست منى وكمال افندي …
بعد الفطار قعدوا مع فؤاد افندي والست ازهار يضحكوا ويتسامروا في البلكونة وكانت لقمة القاضي احلى تحلية جنب فنجان القهوة اللي بعد الفطار …
وبدأت الحكايات والضحكات تعلى … وصوت صلاة التراويح مالي الجو حواليهم
طولت عليكم … ووجعت دماغكم …بس قعدتكم ما تتملش … قوليلي قومي شوفي اللي وراكي … فوتكوا بعافيه
