الكشري المصري
الكشري المصري
بقلم مها بدوي
الكشري المصري حكايتنا اليوم في حكاية وصفتنا مساء الجمال… مساء السعادة…. مساءكوا هادي ونادي بإذن الله… مساءكوا قهوة مضبوطه تعدل المزاااج ☕️❤️☕️❤️
رمضان أيامه بتجري … يوم في ليلة … ايامه حلوة … نهاره شرح وبرح كده …. نصلي الفجر ونريح شويه …نصحى على تواشيح وابتهالات … اغاني رمضان … جيران يخبطوا على بعض … يسالوا على بعض … ويشوفوا طلبات بعض … اللي نازلة تجيب خضار تجيب لجارتها اللي ناقصها …. بياع خضار ينادي بعلو صوته …. يا ابو الخزين يا بصل … يا مجنونة يا اوطة …. يا بتاعت التحمير يا بطاطس …. وتبدأ الروايح الحلوة تطلع من المطابخ …. ايفون تصبح على الست سميحه من شباك المطبخ … ويحكوا سوا طول واقفتهم في المطبخ ….
فؤاد افندي صحي بدري وجهز نفسه … علشان يلحق الشغل … ونادى على ازهار وهو نازل …. وقال … محتاجه حاجه يا ست الستات اجيبها وانا جاي …. محتاجه ايه زفر اجيبه معايا …. بصتله الست ازهار في عينه وهي بتبتسم وقالت لا مش هنحتاج النهاردة زفر …. بصلها فؤاد افندي وضحك كده وسقف بايده تسقيفه عاليه … وقال الله يبقى الفطار النهاردة كشري صح … ضحكت وقالتله … صح يا سي فؤاد …. رد عليها وقال الله … يا سلام عليه بالدقة الموحوحة والصلصلة المشطشطة وشوية حمص على الوش …. حاجه عظمة والله ….
ماشي يا ست الستات … اخلص الشغل واجي جري اساعد معاكي …. نعمل شوية عرقسوس وتمر هندي جنب الكشري … ويا سلام بقى على شوية قطايف محشية مكسرات يا وعدي يا وعدي … اشوفك على خير …. ترجعلي بالسلامة يا سي فؤاد … ردت عليه الست ازهار وقالتله … على فكرة اوعى تنسى تعدي على منى و سي كمال لأجل يجوا يفطروا معانا …. اصل سي كمال كان قال نفسه في الكشري
دخلت الست ازهار تجهز للكشري… جهزت تلات حلل
👈في الحلة الأولى… حمرت بصله كبيرة في شوية زيت واول ما بقى لونها دهبي …. حطيت عليهم كوباية عدس بجبه (العدس الاسمر) مغسولة ومنقوعة…. وحطيت عليهم كوباية ماية وسابيتهم لما المايه غليت .. لما غليت نزلت عليهم كوباية ونص رز مغسول وزودت عليهم كوبايتين مايه ووطيت عليهم النار بعد الغليان وسابيت الرز والهدس يتشربوا على مهلهم.
👈في الحلة التانية حطيت فيهم طماطم معصورة وعليهم معلقتين زيت وتلات اربع فصوص توم مهروسين مع قرنين فلفل حامي وضبطت الملح بتاعهم وسابيتهم على النار ياخدوا ويدوا مع بعض
👈في الحلة التالتة سلقت فيها شوية مكرونة مقصوصة
👈وفي ازازة كبيرة جهزت دقة الكشري …. كمون مطحون على عصير لمون على خل على توم مدقوق وزودت عليهم شوية مايه ومعلقة ملح ورجت الازازة كويس وحطيتهم على جنب
… عدى النهار وسمعت الست ازهار صوت رجلين طالعة تجري على السلم … وخبط خفيف على الباب وصوت الاستاذ كمال بيقول من ورا الباب … الله الله على الروايح اللي تدوخ دي …. كشري صح …. اصل فؤاد قال ان في مفاجأة … والله يا ست ازهار … جاي من جاردن سيتي لحد الجماليه وانا شامم ريحة اكلك الجميل …. كل سنه وحضرتك طيبه … دخل كمال افندي بعد ما سلم على فؤاد والست منى وازهار خدوا بعض بالحضن …. وبدأت الأطباق تترص …
ايشي صلصة طماطم متسبكة بفصين توم وشوية زيت وقرنين فلفل حامي تخلي الصلصة مشطشة تفتح النفس وجنبهم طبق مكرونة مسلوقة …. وحمص مسلوق وشوية كشري متسوي العدس مع الأرز معاهم بصلية متقليه…. وشوية دقة بالخل والتوم والكمون …. اما البصل المتحمر المقرمش يتحط على الوش يدي حلاوة وقرمشة للطبق جميلة…
سمعوا صوت مدفع الافطار واصل من القلعة واذان المغرب مالي الشوارع …. وقعد الصحاب ياكلوا الكشري سوا …. وبدأت الحكاوي بينهم وقعدة البلكونة مع العرقسوس والتمر هندي وصوت صلاة التراويح مالي المكان
طولت عليكم … ووجعت دماغكم …بس قعدتكم ما تتملش … قوليلي قومي شوفي اللي وراكي … فوتكوا بعافيه
