من القلب للقلب ❤️❤️
جملة بنستخدمها كتير في حياتنا اليومية ،للرد علي تعبير شخص صرح بمشاعره الإيجابية تجاهنا.وساعات بنمط المعني للإتجاه العكسي علشان نعبر عن مبادلتنا نفس المشاعر السلبية لشخص معين تاني غير الأولاني اللي بنحبه .☺️
وكأن مشاعر الحب والكره بتستخدم أدق قوانين الفيزياء وبتعرف تمشي في مسار مستقيم.
جملة(من القلب للقلب) ممكن تبان بسيطة لكن مدلولاتها واسعة جدا ومعناها وضح أكتر لما بقى عندنا حياتين حياة واقعية بنتعامل فيها مع أشخاص من لحم ودم .بني أدمين بنحبهم بحكم صِلات القربي والدم والزمالة والجيرة والنسب .بشر أنصفونا في موقف ظلم أوسندونا في عثرة إتعرضنالها
بيننا وبينهم ذكريات طفولة ومراهقة وشباب
حضروا أفراحنا وفرحوا معانا وحضنونا وطبطبوا علينا في وقت حزن ،علمونا وخدوا بإيدينا وقت ماغلطنا ماحكموش علينا وبقوا جلادين علشان يرضوا غرور أو يراعوا مجتمع سطحي
وأشخاص تانيين خذلونا في عز إحتياجنا ليهم ،أول من علمونا معني السراب. موجودين وقت الفرح ووقت الحزن بخار ميه
الإسم صديق وحبيب والوظيفة قاضي وعشماوي يصدر الحكم بأقصي عقوبة وينفذه ،علاقات محكومة بغيرة وحسد مدفونين ورا إبتسامة صفرا وطبطبة لزجة
بتتعلم بفطرتك أنك تفرزهم ،وساعات الهالة السلبية تدخل المكان قبلهم وتحس بدرجة حرارتك بتعلي ودانك بتوش وعيونك بتزغلل
يكفينا ويكفيكم شرهم وشر تواجدهم وشر تدخلهم وشر ظلال رمادي بيضلموا بيها قلوبنا .
الغريب إننا لما ظهر في حياتنا حياة من نوع تاني(حياة إفتراضية بكل أنواعها وطرق التواصل فيها نقلناهم معانا بنفس المشاعر اللي بنحبهم بنعرف نوصلهم حتي نطمن علي أخبارهم من بعيد لبعيد لسرعة الزمن والمسئوليات اللي بقت حجر تقيل في رجلينا لكن فيه إبتسامة سحرية بتظهر علي وشنا لما أساميهم بتظهر علي أي وسيلة تواصل.
والبعدا التانيين برضو بيسحبوا الأكسجين الإفتراضي من أي وسيلة 😂
أما بقي علاقات العالم الإفتراضي بقي دي دنيا تانية ،بمجرد قبول طلب الصداقة أو إرساله بتبتدي علاقة مفروض إنها تبقي إيجابية بس لأني طلبت بدون أي إجبار لي أو للطرف التاني إننا نتشارك هذا العالم المكون من حروف وصور وممكن يتطور لڤيديو مسجل أو بث حي
علاقة في إطار من الأدب والذوق لأننا وجدنا نفسنا بنتشارك في أفكار أو مواهب أو إهتمامات عامة .
بنهني بعض بالمناسبات وبنبعت تعازي ومواساة
ومع مرور الوقت بنكتشف إن قوانين الفيزياء عرفت تخترق الواقع الإفتراضي ده وحولت الأشخاص اللي عبارة عن اسم وصورة لأشخاص بنحبهم وبنحب نطمن عليهم وفي حالات كتير اتحولت العلاقة من الإفتراض لأرض الواقع بقينا بنتكلم في التليفون وبنزور بعض وفي بعض الحالات وصلت إن فيه زيجات كانت بدايتها طلب صداقة علي الفيس بوك او متابعة علي الإنستجرام
الفرق في العلاقات دي وجود خاصية مهمة جدا للشخصيات السلبية والسامة(البلوك) بضغطة بسيطة ترتاح من متابعة وملاحقة شخصية سامة بحركة بسيطة صعب جدا جدا جدا تعملها في واقعك الأرضي.
وأنا بتكلم معاكم افتكرت مثل مصري قديم بيقول(خد من الطاقة وحط في الطاقة تلاقي في الطاقة) والطاقةفي المثل الأصلي كانت فتحة في الحائط في بيوت أهالينا في الريف بيتعاملوها معاملة الخزنة ومعناه إنك طول ما بترجع فلوس في نفس المكان اللي بتاخد منه المرة الجاية هاتلاقي.
وفي موضوعنا هنا الطاقة هي الطاقة والبراح اللي موجود جوانا طول مالعلاقات سوية وبتدي زي مابتاخد حب وإهتمام ووقت، طول ماتلاقي تقدير وإحترام سواء كانت علاقات واقعية أو إفتراضية .
بقلم:فاتن جلال (ماما فاتن)
