القهوة وما فيها … الحلقة الخامسة عشر
حلقات مسلسلة لعشاق الجمال الاسمر الملقب بالقهوة
بقلم مها بدوي
صباح السعادة … صباح الجمال…. صباح الفل والياسمين على عشاق الجمال الاسمر الملقب بالقهوة …. صباحكوا هادي ونادي بإذن الله… صباحكوا قهوة مضبوطه تعدل المزاااج ☕❤☕❤
صحيت الصبح كالعادة (ربنا ما يقطع لنا عادة ) وشربت الفنجان بتاعتي وسرحت في طعم القهوة وجمالها … يا سلام قد ايه القهوة دي شئ جميل … لون ابنوسي غامق جميل وريحة تملى المكان وتعطره وترفعه من مكان عادي لمكان مريح نفسيا … قد ايه القهوة دي بتغير مزاج الإنسان… تروق بالك وتسعد قلبك وتخدك في رحلة جميلة فوق السحاب تسرح في جمال خلق الله وملكوته…
عرفنا يا سادة ان القهوة دي أنواع منها الطلياني والامريكاني والجريجي والفرنساوي … لكن يا سادة لازم نعرف ان العرب كان ومازال ليهم صنف قهوة مخصوص باسمهم … من المعلوم يا سادة ان العرب اشتهروا زمان ومازالوا…. بانهم مصدر كرم الضيافة وأصول الترحاب وعلشان كده كانت قهوتهم خاصه بيهم ومميزة ليهم … وعمر ما ضيف دخل عندهم وشرب قهوتهم الا لما ارتاح ونال المراد ولازم ولابد يعود تاني لأهل الكرم والضيافة يتونس بيهم ويتحامى فيهم …
رجع فؤاد من الشغل وقبل ما صباعه يرن جرس الباب … لقي الباب بيفتح والست ازهار واقفه على الباب مبتسمة وبتستقبله وفرحة لقاه باينه من عينيها …. دخل البيت وهو حاسس ان داخل مملكته … ازيك يا ازهار … تسلم وتعيش يا سي فؤاد …. ايه الروايح الحلوة دي يا ست الستات … احمر وش الست ازهار وقالتله فضلت خيرك عاملين صياديه … سمك على فريك … كام سمكايه الست إصلاح جابتهملي النهاردة وهي جاية تزرنا كانوا صاحيين وبيلعبوا…. رد فؤاد وقال… الله كان نفسي في سمك .. ان شاء الله ناكله بالهنا… يا ازهار … حضري نفسك النهاردة … كمال ومنى جايين يزرونا … بص فؤاد لازهار بصه من تحت لتحت وابتسم … جايين يقروا فاتحة الست سهير ومعاهم استاذ حسين طبعا … زغرطت ازهار زغروطة رنت في البيت … وسمعت ضحكت فؤاد بعد الزغروطة … الف بركة … ربنا يخليك لينا يا سي فؤاد ومايحرمناش منك … على ما تغير هدومك يكون الغدا جاهز …. طبعا جهزت ازهار الغدا وفي نفس الوقت بعتت البنت إحسان تجيب ٢كيلو شوكولاته من عند جروبي وعجنت كيكة برتقان بالبندق وواحدة تانية بالكاكاو وحطيتهم في الفرن … على ما اتغدت هي وسي فؤاد كانت ريحة الكيكة مغرقة البيت … فتحت الشبابيك ودخلت شمس العصاري البيت وشغلت الست تعلي الغنا وتقول (يارب … تفضل حلاوة سلام اول لقى في ايدينا … وفرح اول ميعاد تنقاد شموع حولينا …. ويفوت علينا الزمان يفرش آماله علينا)
لبست فستانها الأزرق وجزمه كحلي عليه وقعدت تشرب فنجان سريع قبل الضيوف ما تيجي ..وسرحت بخيالها… شافت سهير بفستان الفرح وشافت عيالها وعيال عيالها … واتمنت في سرها ان ربنا يتمم بخير … رن جرس الباب … فتحت إحسان الباب ودخلت منى وكمال ووراهم حسين …. اهلا وسهلا اهلا وسهلا خطوة عزيزة … قالت الست ازهار وهي بتحضن منى وتبوسها وكمال وفؤاد سلموا على بعض بالأيدي والاحضان … ودخلوا كلهم على الصالون وبدأ كمال الكلام وهو بيضحك .. طبعا سبب الزيارة مش مفاجئ بالنسبالك يا فؤاد … الظاهر الاولاد دول هيكبرونا بدري … الحقيقة احنا جايين النهاردة نطلب ايد كريمتك سهير لابننا حسين … ان شا الله ما يكونش عندك مانع … قال فؤاد … ده شرف لينا حسين ابننا زي سهير ما هي بنتكم …على بركة الله … وف نفس الوقت زغرطت ازهار ومنى تعبير عن فرحتهم وميلت منى على ازهار وقالت لها كده بقى عمرك ما تبعدي عني … وسمعوا كلهم جرس الباب … قامت ازهار تفتح الباب … لقت جارتهم ام فهد واقفه هي وزوجها على الباب … قالتلها اهلا وسهلا … اتفضلوا ..ردت ام فهد وقالت سمعنا زغاريد … جينا نهني ونبارك وجايبين قهوتنا ويانا … ردت ازهار وقالت اتفضلي خطوة عزيزة ..اصل حسين خطب سهير بنتي ردت ام فهد وابو فهد بالمبارك بالمبارك … تغلبها بالمال وتغلبك بالعيال .. قربت ام فهد من منى وهي ماسكة دلة قهوة نحاس بتلمع وفنجان مدور صبت من الدلة في الفنجان ربعه وقدمته لمنى … بصت منى للفنجان وهي مستغربه … ضحكت ام فهد وقالت لا تستغربين هذي قهوة عربية من اهل الجود والكرم ..حنا ما نصب الفنجان للأخير… هذي عوايدنا نسميها صبة الحشمه لا وازيدك من الشعر بيت … نصب القهوة لين تسكتفين وتهزين فنجانك …. هذي قهوة الهيف وقهوة الضيف وقهوة الكيف وقهوة السيف … ما يشربها ويانا الا الاهل والاحباب وأهل الشيمه والحشيمة … تفضلي قهوة عربيه مطبوخة بالهيل والزعفران والمسمار ما نشربها الا ونترجى خير … بالمبارك عرسكم …. ضحكت ازهار و منى واخدت الفنجان وهي فرحانه …فاهمه نص الكلام بس عارفه مضمونه … قربت ازهار الفنجان من بقها وقالت … الله تسلم ايدك يا ام فهد ريحتها حلوة … شمت ازهار ريحة حبهان قوية ومعاها ريحة ورد وزهور … اصل ام فهد كانت ماسحة الفنجان بماية الورد…. اول ما ازهار داقت القهوة في بقها حسة بلسعة كبش القرنفل مخلوطة بالحبهان والزعفران … حاجه كده تشيلك وتوديك حكايات الف ليلة وليلة … دخلت بدرية بنت ام فهد وهي شايلة مبخرة خشب عليها شغل نحاس وطالع منها ريحة بخور عود ملت المكان … ضحكت ام فهد وقالت … زين نستأذنكم… على قولتنا… ما بعد العود قعود … مبارك عليكم عرسكم …
من هنا يا سادة نعرف ان القهوة العربية نوع مختلف خالص من القهوة .. قهوة خضرا مطحونة مع حبهان وقرنفل وزعفران … ليها أصول وطقوس غير في تقديمها … لازم تتعمل والا تبقى عيبه …. خلاصة القول ان القهوة بتتقدم في كل المناسبات أفراح أحزان… هيام وحب … اشتياق ولهفة … تفكير وتخطيط … كل وقت وليه قهوته
طولت عليكم معلش اعذروني قعدتكم ما يتملش منها … فوتكوا بعافيه
