أهلًا أهلًا يا رمضان
أهلًا أهلًا يا رمضان
بقلم نجلاء علي : الفراشة الزرقاء
أهلًا أهلًا يا رمضان
هِل علينا بكل أمان
فاكرين وسط حارتنا زمان؟
لمّا جيراننا وكل أحبابنا
الكل يهني وفرحان
ونعلق زينه في شوارعنا
وبنتسحر ، نسهر ، نفطر
سوا مع بعض في كل مكان
جارنا مسيحي و جارنا المسلم
بيعلقوا زينة رمضان
مبتفرقش في مصر عشان
مصر هتفضل وِحْدة وواحدة
طول العمر وكل أوان
أمي وخالتي جارتنا إيڤون
كانوا إخوات مش بس جيران
من خير مطبخنا ومطبخهم
خير بيكفي الكُل كمان
أطباق طالعة وأطباق نازلة
تملا موائد للرحمن
والفرحة بترقص في عنينا
لمًا بيضرب قبل المغرب
مدفع إفطار والشيخ رفعت
يِدّن وبصوت كله حنان
ونروح نفطر بعد أدان
والتسابيح والذِكْر ونحفظ
اللي اتيسر م القرآن
لسه في مصر
اللمة الحلوة والتفاريح
فيها بنسمع أجمل غنوة
والتواشيح
وحوي يا وحوي ،
حاللو يا حاللو،
أهلاً رمضان
رمضان جانا ، افرحوا يا ولاد
ورمضان يجري ونقول بدري
نفرح بعدها بالأعياد
مهما هنكبر بفانوس أحضر
هنغني ويّا الأولاد
ونقول على مَرْ الأزمان
أهلاً أهلاً يا رمضان .
بقلم / نجلاء علي حسن
الفراشة الزرقاء 🦋
