أمي نسختي الأولى
أمي نسختي الأولى!
بقلم الفراشة الزرقاء،
كل حاجة لأ لأ
كل شيء مرفوض أكيد
الخروج ويّا الصحاب
وإني أروح مشوار بعيد
تاخدي أخوكي في ايديكي!
صاحبتك دي بنت مين ؟
والعياط هو رفيقي
والزعل طول السنين
إنتي ليه دايمًا كدا؟
بتردي مش مترددة
بكرا لما تكبري
وتصيري أم هتعرفي
وكل عِندِك يختفي!
رغم إني وارثة عِندِك
رغم إني كنت ضدك
لما أبويا ينكشك ويزعلك
أو بكلمة يجرحك
وإنتي غافرة صابرة راضية
كنت بتجنن يا أمي من رضاكي
بعتبره استسلام
كنت بزعل لما ماتردي
على أسوأ كلام
كنت حالفة لمّا أكبر
عمري ما أبقى نسخة منك
عمر ما أقبل إني أصبر
ع المشاكل والألام
والزمن يجري يا أمي
واتلهيت في دنيتي
جامعة، بيت،زوج وعيال
والمعافرة قسمتي
والتقيتني واحدة واحدة
ماشية زي المسطرة
فوق خطوطك اللى كانت
خلتني يوم متكدرة
والتقتني في كل شيء
نسخة ليك متكررة
وبكل فخر أبتسم
وأبوس في صورتك
أقول لها
هي دي ست الحبايب
اللي ربت صح مفيهاش كلام
هي دي أمي اللي كنت
فهمتها غلط زمان
يانسختي الأولى اللي بفخر
إني حته منها
واللي بدعي ربي دايمًا
إني أبقى زيها
اقبلي من خضوعي
اقبلي حبي وسلامي
اقبلي التوبة ياصابرة
ع العناد اللي ف كلامي
كان زمان
وكنتي مبتسمة تملي
وعارفة إني راجعة ليكي
بالمحبة والاتزان
ألف شكر
ألف شكر ياللي ربيتينا صح
ياللي علمتينا
إن الله حامينا
من فوق سبع سموات
نعبده ونعمل اللي علينا
وبكل اجتهاد
والنجاح منه قدر
ورحمة منه للعباد
وابقي سامحيني ياغالية
سامحيني ياما ع البعاد
والانشغال بالسفر أو بالولاد
والله قدري وقسمتي
إن شوقي ليك يقطع مهجتي
ودعوتك ليا حتى ع التليفون
تصبرني وتمسح دمعتي
ربي يحميكي ياغالية
ربي يا أما يحفظك
وتكوني لي نور هداية
ربي يا أما يحرسك
وابقي إدعي للولاد
كل عيد أم يا أمي
وإنتي أمي ودنيتي
كل عيد وإنتي دُعاكي
نور ينور سكتي .
بقلم / نجلاء علي حسن
الفراشة الزرقاء🦋
***”أمي نسختي الأولى” تعبر عن مدى تشابه الشخص بأمه. قد تعني أن الشخص يشعر بأنه يشبه والدته في الشخصية أو التصرفات أو حتى الشكل. إنه تعبير شاعري وجميل يوضح قوة العلاقة بين الأم وأبنائها.
