أبداعات فنون الصلصال الحراري…الفنانةً هايدي سعيد …أنامل مصرية مبدعة تخطو للعالمية

تقديم المحررة / د: مريم سامي

النهاردة معانا فنانة من اجمل فنانات الهاندميد المصريات العاشقة لكل انواع الفنون و خصوصا أبداعات فنون الصلصال الحراري…
تميزت فيه جدا لدرجة الابهار
معانا ….فنانتنا هايدى سعيد
صاحبة الانامل الذهبية والى خطت خطوات كبيرة جدا فى ابداعاتها حتى سارت فى طريقها للعالمية

*هايدى خريجة كلية الفنون الجميلة عام 2008
وهى تعيش حاليا فى ويلنجتون بنيوزيلندا

* هايدى عاشقه لكل انواع الفنون من وهى صغيره .
لحد مكتشفت الصلصال الحرارى اللى عرفته من خلال برنامج تلفزيونى من حوالى عشر سنين تقريبا.
وكان فى الوقت دا قليليين بس اللى يعرفوه فى مصر لعدم توافره.

* وساعدها السفر لانجلترا ان موهبتها تكبر لما الخامات والادوات بقت متوفره بالنسبة لها

* ورغم انها كنت ام جديده والوقت عندها كان قليل بس كانت بتحاول على قد مقدرتها انها متضيعش اى وقت تعمل الحاجه اللى بتحبها.

*اكيد وجود ناس بيحبونا❤ ويشجعونا بيفرق معانا كتير جدا وهو دا اللى حصل مع هايدى

*اللى شجعها فى الاستمرار كان والدها وجوزها وهما اللى ليهم الفضل الكبيير ❤
.*والدها من محبى الرسم والفنون دايما كان قدوتها كانت دايما تشوفه وهو بيرسم دايما ..وكل ادوات الرسم اللى كانت بتحتاجها دايما كانت حواليها ودا زود حبها للرسم .

*استلم المهمه بعد والدها زوجها اللى دايما كام مؤمن بيها اكتر من ايمانها بنفسها . كان بيحاول على قد ميقدر يوفركل اللى بتحتاجه من خامات حتى ولو كانت مجنونه ومكلفه وبالرغم انها اهدرت كتيير منها بس هو دايما يشجعها ويقوللها المهم انك تعملى اللى بتحبيه وواثق انك هتبدعى

.*وهو دا اللى خلاها عايزه تثبت نفسها عشان متخيبش ظنه فيها ابدا وان هو سبب نجاحها❤

*التشجيع مهم جدا
بس اكيد فيه خطوات تانية اهم
ولما سألت هايدى كان دا ردها

((للى خلانى وصلت للمرحله الحاليه هى التدريب الكتير والمستمر. تدريب للعين وللعقل وللايد وللخيال. تدريب للخامات المختلفه ودمجهم مع بعض وان استخدم حاجات محدش استخدمها قبل كدا عشان دايما اخلى شغلى متميز . والاهم من دا كل حبى الشديد للصلصال خلانى بشوفه بشكل مختلف بتخيله فى كل حاجه بعملها تقدرى تقولى بقيت مجنونة صلصال. ))))

*هايدى ماخدتش فيه اى كورسات نهائى كله بمجهود وتدريب ذاتى.

*هى تقريبا مخترتش الصلصال هى انجذبت ليه بكل تفاصيله . شافت فيه الخامه السحريه اللى ممكن تطلع فيها اى حاجه تتخيلها.

*بدأت الاول بعمل اكسسواراتها اللى اصبحت مميزة و مش موجوده عند حد.
وبعدها استخدمته فى الملابس وعملت بيه نوت بوك ومجات وفريمز للصور ومدليات ولوحات . خامه متجدده متزهقش منها ابدا وافكارها كتيير جدا

*.هايدى لما شافت الفنانات الروسيات واتقانهم كان دا هدفها ان شغلها يوصل لمستواهم ومش هتقبل باقل من كدا
وباذن الله هايدى هتوصل لحلمها ويكون لها براند عالمى لانها فعلا مبدعة ومختلفة وفنانة بمعنى الكلمة

*لما سألتها ايه الصعوبات اللى بتواجهك حاليا ؟دا كان ردها

((اصعب حاجه فى الصلصال حالياا هو الخروج بافكار جديده ودا تحدى بالنسبالى . فن الصلصال بقاله اكتر من ٣٠ سنه تقريبا فى اوربا ولسه فى مصر من سنتين بس. فالافكار كلها استهلكت وتحدى كبير قدامى وقدام الناس اللى شغاله فى نفس المجال انها تخرج بافكار جديده. بس انا مش بياس وبحاول اغير وبخرج بتكنيكات قديمه وبستغلها بطرق جديده متعملتش قبل كدا فى مجالى. لكن المحبط فى الموضوع حاليا التقليد الاعمى خصوصا لما تحاول تتميز وتلاقى التقليد بيحصرك فى خانه صغيره ودا بيخلينى اصيب بالاحباط للاسف كان الناس بتمنعك ان يبقى ليك اسلوبك الخاص فى شغلك.)))

*اما عن التسويق ..هايدى بدأت بعرض شغلها على احدى الجروبات ومش بغرض البيع لكن لنشر فنها وفوجئت بالاعجاب الشديد من كل الناس وان الكل بيطلب شغلها
من هنا بدأت تفكر فى عمل جروب خاص بيها وبدأت تسوق شغلها
فى نيويلاند والحمدالله لقت صدى جميل جدا وبدأت تتشهر فى نيوزيلاند

*ولما سألتها …من وجهة نظرك ايهما اهم الموهبة ام الدراسة والتعليم ؟؟وايه رأيك فى جروبات الهاند ميد ؟؟؟؟؟؟
دا كان ردها
((((( الموهبه هى الاساس. وحبك للفن هو اللى بيخليك تبدع . التعليم مهم بس مش هو كل حاجه . والدليل ان فى مبدعيين بالفطره والموهبه وفى خريجيين كليات فنيه مقدموش اى شئ يذكر.

الجروبات اللى بتعرض الفنون مهمه للتعريف للفنون وانه يكون ملتقى للفنانيين يتناقشوا فيه اهتمامتهم او مشاكلهم . لكن لو اتحول لتلقيين الفن او تعليبه هنا بيبقى كارثه. تعليم الفن مش بالخطوات او المقادير كانه طبق اليوم الفن عايز خيال واسع وجرأه كبيره وتجربه واخطاء عايز جنون من الاخر
. لكن للاسف بعض من الجروبات اللى موجوده بقت تعمل كدا ازاى تصبح فنان فى عشر خطوات ودا حاجه مخزيه بجد بتقتل اى ابداع وتخلق طابور من التقليديين مش الفنانيين))))))
.
*هايدى حلمها للهاند ميد انه ياخد حقه اكتر من كدا فى مصر . نشر ثقافة الهاندميد .فى كثير من الدول اللى اهتمت بصناعات الهاندميد وجعلتهامن اقوى فنونها بقت من اساسيات الدخل القومى والسياحى دا غير فتح باب التصدير .
*هايدى بتحلم بتفعيل حقوق الملكيه الفكريه فى مصر ويبقى على نطاق واسع ومسموع وزى ماقالتلى

((دا لو حصل هتلاقى فى مصر خروج براندات عالميه متقنه لان الفنانيين هيبدعوا وينشروا شغلهم ومش هيخافوا من سرقةةتعبهم ومجهودهم وهيجبر اللى بيقلدوا انهم يفكروا بشكل مختلف.)))

*هايدى بتحلم ان شغل الهاند ميد يخرج عن نطاق البيع ويتعامل كانه فن ليه احترامه ومكانته. دا هيخلى الناس تبدع بجد مش مجرد تجارة

*فى نهاية حوارى الممتع جدا مع فنانتنا الجميلة هايدى سعيد فى أبداعات فنون الصلصال الحراري…بتمنى لها كل التوفيق والنجاح وتحقيق حلمها وتبقى فنانة عالمية ان شاء الله قريب جدا لانها حقيقى تستحق وعن جدارة

*انتظرونى فى حوار جديد وفنان من فنانين الهاند ميد
دكتورة ..مريم سامى

أقرء ايضا فى **فن الميكب ارتيست**

تابعونا على فيس بوك*** https://www.facebook.com/%D9%85%D8%AC%D9%84%D8%A9-%D8%B9%D8%B1%D9%8A%D8%B3-%D9%88-%D8%B9%D8%B1%D9%88%D8%B3%D8%A9-Groom-Bride-Magazine-313575946143990/