ساحرة الألوان نيڤين محمود
بقلم/ منى منصور
اليوم سوف نبحر في عالم ساحرة الألوان نفين محمود والخطوط والظل والنور هم أدوات الرسام حين يبدء فى لوحة جديدة
ولكن يبقى عنصرا هاما سئلنا ساحرة الألوان نيڤين محمودفى كل لوحة أبحث عنه
وإذا لم أجده انصرف فوراعن مشاهدة اللوحة ألا وهو الأحساس روح الفن والشعور الذى تنبض به اللوحة
وهذا ما حدث حين رأيت لوحة من لوحات فنانتنا اليوم ساورنى أحساس بالحرية
والأنطلاق والخيال فسارعت إلى التواصل معها لأنقل تجربتها مع فن التصوير الزيتى
وكانت المفاجأة أنها فى رقة الفراشة ووداعة الملائكة إنها الرسامة الموهوبة نيڤين محمود
وبدأت حوارى معها
عرفينى بنفسك!!!
أسمى نيڤين محمود
خريجة فنون جميلة قسم ديكور عمارة داخلية جامعة حلوان
اشتغلت في الديكور والأثاث لمدة خمس سنين ..ونظرا لظروف الزواج والانجاب تركت مجال الديكور واتجهت لرسم اللوحات الفنية وبيعها اون لاين
كيف بدائتى حياتك العملية؟؟
كنت بشتغل فى جاليرى للأثاث لمدة ثلاث سنوات..لكن لظروف الزواج والانجاب اضطريت اترك الشغل ده ..وبعد فترة اشتغلت نفس شغلى فى الأثاث لكن من البيت ..فكنت برسم الرسومات الخاصة بالاثاث و ابعتها للمكتب ..استمريت فى الشغل من البيت فترة لغاية قيام الثورة ..بعدها الشغل قل تماما..فأستغليت موهبتى بالرسم وتسويق رسوماتى عن طريق وسائل التواصل الاجتماعي..وخاصة الفيسبوك..قعدت حوالى سنة ونصف ما قدرتش ابيع اى لوحة من لوحاتى ..بعد سنة ونص ابتدت الناس تبعتلى عايزة لوحات وابتديت ابيع الحمد لله
ساحرة الألوان نيڤين محمود
ما الصعوبات التى واجهتكى فى بداية عملك الفنى؟؟
من الصعوبات اللى واجهتنى فى الاول بعد ما ابتديت اعمل صفحة عالفيسبوك انى مكنتش عارفة اسوق لوحاتى أو أبيعها بس مع ذلك استمريت فى الرسم وتقريبا فاتت حوالى سنة ونص لغاية ما ابتديت ابيع اول لوحة وبعدين ابتديت ابيع لوحاتى واتعرف فى الوسط بتاعى والناس اللى حواليا من زمايلى واصدقائى اللى عالفيسبوك انى برسم وخصوصا أن زمايلى معظمهم بيشتغلوا فى الديكور ..فأبتدوا يستعينوا بيا لو حد من عملائهم عايزين يقتنوا تابلوهات ..
ما الدور الذى لعبه الأهل فى تنمية موهبتك؟؟
طبعا من زمان جدا يمكن من أولى إعدادى وانا حطيت هدف فى حياتى انى نفسي ادخل فنون جميلة ..وطبعا مامتى وبابا كانوا بيشجعونى جدا وبيتمنوا انى احقق حلمي..وخصوصا انى كنت بقول لمامتى انا لو مدخلتش فنون جميلة مستقبلى حيتدمر
هل كان زوجك يشجعك على الأبداع والعمل؟؟؟؟
زوجى دايما بقى كان بيشجعنى وعنده نظره فنية لأن باباه كان فنان برضه وأما كنت بكسل و ما ارسمش لفترة طويلة . كان بيقولى لازم تشتغلى وترسمى وكان بيجيبلى الخامات اللى محتاجاها للشغل ..ولأنه كان مؤمن بقدراتى وبطبيعة عمله كمدير تسويق بأحدى الشركات الكبرى كان دائما بيفتحلى مجالات لتسويق اعمالى سواء عن طريق مواقع التواصل الاجتماعى أو عن طريق العلاقات الاجتماعية
هل يؤثر العمل فى مجال الفن على حياتك الأسرية؟؟؟
عموما دائما الاولاد والبيت ليهم الأولوية ..انا كنت بشتغل بعد يوم العادى فى البيت وبعد ما نخلص المذاكرة والولاد يناموا ابتدى اشتغل
هل كان للمدرسيكى دورا فى تنمية مهاراتك الفنية؟؟؟
تقريبا من ابتدائى ..وكان بالفعل مدرسة عربى مش رسم اللى أثرت فيا لأن خطها كان جميل جدا جدا ..فكنت بحاول اقلده ..كأنى برسم خطها..
هى كانت مدرسة جميلة و طيبة جدا ..عشان كدة اتأثرت بيها ولسة فاكراها لغاية دلوقتى
كان حديثا شيقا نقلتنى فيه الفنانه نيڤين محمود إلى عالم مملوء بالبهجة والألوان
واضفت إلى رصيد صداقاتى صديقة رقيقة أفخر بها
#بقلم منى منصور
#مجلة زهوة
