حلقات مسلسلة لعشاق الجمال الاسمر الملقب بالقهوة
صباح السعادة … صباح الهنا … صباح الروقان …
بعد ما كانت القهوة مشروب للكبار بس … وان مش من الاخلاق ان اي بنت او شاب صغير يشرب قهوة سواء في البيت أو بره … وكانت الناس بتعتبر ان اي حد صغير يشرب قهوة تبقى عيبه كبيره…. انتشرت القهوة وبقت شئ موجود في كل بيت … ودخلت في كل حاجه حلوة … شوكولاته ..كيك … ايس كريم
وصل فؤاد افندي المصلحة … لقى في حركة غريبه في المكتب …بدأ يدور على كمال و شوقي … علشان يسأل ايه السبب … لقى صاحبه كمال داخل ووشه منور كده واول ما دخل … بص لفؤاد وضحك كده وراح مقرب منه وقاله بصوت مسموع … المدام وضعت امبارح … جبنا حسين الحمدلله … نور وش فؤاد وراح واخد صاحبه بالحضن وسلم عليه بالجامد… الف مبروك يا كمال .. الف مبروك … يتربى في عزك ان شاء الله … رد عليه كمال وقاله كده حاف … لا … هنستناكم يوم الجمعه الجايه لاجل تحضروا سبوع المولود … ولازم تجيب الجماعه بتاعتك لاجل ما تتعرف على المدام … رد فؤاد وقاله ان شاء الله… كمال قال اصل لازم نعمل حفلة صغيرة نفرح العيلة والحبايب… طبطب فؤاد على كتف زميله وقاله الف مبروك أن شاء الله اجيب المدام واجيلك.
يوم الجمعه … جهز فؤاد افندي نفسه وازهار استعدت ولبست الفستان الأخضر الفاتح ابو ورد كحلي مع شنطه وجزمة كحلي وكانت متشيكة آخر شياكة أصلها عارفة ان منى مرات كمال من عيلة ذوات خالص و اشترت للمولود دبوس دهب فيه خرزه زرقه تحمي من العين … هديه تشرف … وقفوا الحنطور وركبوا قاله فؤاد … جاردن سيتي يا اسطى … وصل فؤاد افندي والست ازهار لبيت كمال افندي … واول ما نزلوا حسوا بفخامة المكان … بيت كبير بجنينه كبيرة … وبمجرد ما دخلوا المكان سمع فؤاد صاحبه كمال بينده عليه … مكان جميل مليان زرع وفيه ورد أشكال وألوان… وريحة الورد مليه الجو … وفي نفس الوقت في ريحة بخور ماليه المكان … عاملة توليفه مريحة للاعصاب بتدخل المناخير وتوصل للعقل … تديك شعور بالسعادة غريب … قصر الكلام … دخل فؤاد وازهار .. لقوا المكان مليان ترابيزات وسط الجنينه … والمولود محطوط في سرير وعليه ناموسيه لبني والستات واقفين مع الست منى زوجة كمال افندي … بس الحقيقة كل واحدة احلى واشيك من التانية فساتين كلوش وألوان جميلة وضحك مالي المكان .. الفرحة بالمولود حلوة قوي … أصله الحفيد الاول … قربت منى من فؤاد وازهار وقالتلهم خطوة عزيزة … قربت منها ازهار وقالتلها الف الف مبروك يتربى في عز باباه … ردت عليها منى وقالتلها شرفتينا يا ست ازهار اتفضلي مع الهوانم هناك … واخدتها من ايدها علشان تشوف المولود … ما شاء الله بدر منور … ازهار قالت كده وهي بتمد ايدها بالهديه تحطها جنب المولود … قالتلها منى ايه يا ست ازهار هو احنا بينا الكلام ده … تعبتي نفسك خالص .. تسلم ايديكي … شرفتينا … نشرب الاول المغات… وبعد كده القهوة …. وهذا ما حدث … بعد ما شربت ازهار المغات وقعدت الهوانم تتكلم كل واحدة مع التانيه عن الأحوال والجديد في عالم الموضة وازهار بتسمع كل كلمه وتشارك في الحديث وهي مبسوطة وفي قمة الاندماج … قرب منهم شاب وسيم لابس بدلة سودة ومعاه صينيه فيها فناجين لونها ابيض بخط دهبي محطوط في طبق معاه معلقة دهبي صغيرة … وبدأ يقدم للهوانم الاطباق … ازهار مسكت الطبق بتاعها شافت حاجه بيضه شبه التلج سايحة شوية وحوليها سائل بني دافي … ريحته زي القهوة بس هيئته مختلفة … وحطت ازهار اول معلقة في بقها … حست ببرودة الايس كريم ممزوجة بطعم القهوة الجامد وحست بطعم البندق واضح وظاهر … مزيج من الطعوم… خلقت طعم جديد جدا اول مرة ازهار تدوقه … كملت ازهار القعدة بعد ما عملوا كل طقوس السبوع من الغربال لدق الهون لحلقاتك برجلاتك ورش السبع حبوب واللذي منه وروحت هي وزوجها للبيت وبدأت تحكي معاه عن القهوة الباردة اللي اكلتها النهاردة
من هنا يا سادة … نعرف ان القهوة تطورت بشكل كبير … بعد ما كانت بتتشرب بهيبيتها في فنجان حلو كده …لا بقت تتحط بس على الوش كده بتزود الطعم حلاوة على حلاوته …يعني بقى عندنا مشروبات القهوة الساقعة واللي بقى مسموح لكل الأعمار انها تشربها وتستمتع بالطعم الجميل للقهوة …فعندك مثلا القهوة الافوجاتو…ودي عبارة عن بولة ايس كريم فانيليا بننزل عليها بالقهوة السخنة تختلط مع الايس كريم تدي طعم جديد خالص .. وكمان ظهر الفرابيتشينو اللي هو قهوة وايس كريم يتضربوا مع بعض ويتشربوا
طولت عليكم ورغيت كتير وجه الوقت لازم اروح … قوليلي قومي شوفي اللي وراكي … فوتكوا بعافيه
بقلم / مها بدوي القهوة وما فيها الحلقة السابعة
