القهوة وما فيها الحلقة التاسعة
لعشاق الجمال الاسمر الملقب بالقهوة
بقلم / مها بدوي
صباح الجمال على عشاق الجمال … القهوة عالم كبير وحويط مليان حكاوي فيه اللي غاوي وفيه اللي هاوي فيه اللي قاعد جنب اللي هايم وفيه تلاهي وفيه عبر وفيه تلاقي كل البشر …
سبق واتكلمنا سوا عن اةالقهوة وجمالها …. وعرفنا ان الناس من كل بلد ومن كل لون كانت ليها طريقتها الخاصة في استخدام القهوة في اكلاتها واصبحت القهوة … شئ مشترك بين كل الشعوب وكافة الفئات .. وكانت القهوة هي همزة الوصل اللي دايما تربط مابين الناس .السبب الرئيسي في كسر الحواجز بينهم … عمرنا ما سمعنا عن حد رفض دعوة حد على شرب فنجان قهوة … ولا حد اعتذر لحد عن استقباله لشرب فنجان قهوة … حتى في الخناقات بين الستات زمان … لما كانت الستات تمشي وهي غضبانه .. كانت لازم تنهي الكلام بعبارة … شربنا قهوتكوا خلاص …
الجديد بقى يا سادة ان القهوة دخلت وبشكل جامد جدا في مجال الطب .. طبعا اومال ايه … خاصة في النواحي التجميلية … لقينا ايشي كريمات للوش بالقهوة … وايشي كريم لشد الجسم بالقهوة
بعد ما اتغدى فؤاد افندي … وصحي من نومة العصرية بتاعته لقى الست ازهار … مجهزة القهوة وقاعدة جنب الشباك ومشنكلة الشيش ونسمة هوا العصاري بريحة الورد اللي مزروع على الشباك عاملة ريحة وطراوة جميلة في البيت … قعد فؤاد افندي وقرب فنجان القهوة من بقه … وشفط اول شفطه في القهوة … حس بطعم ماية الورد مع ريحة الورد اللي مغرقةالمكان … ونقلته لعالم تاني فيه زهور وورد وطعم الحبهان انتشر على لسانه … قال فؤاد … الله يا ازهار … مش عارف الواحد من غير فنجان القهوة بتاعك كان عمل ايه … تسلم ايديكي يا ست الكل … ابتسمت ازهار وقالت … ربنا يخليك ليا يا سي فؤاد … هو انا ممكن اطلب منك طلب … قالها .. طلب واحد .. قولي خمس ست طلبات .. ضحكت ازهار ضحكة رقيقة وقالتله … الست فلورا .. جارتنا اللي في العمارة اللي جنبنا … عازمنا على حنة بنتها سارة .. أصلها هتتجوز ابن عمها الواد البير ويروحوا بلدهم إيطاليا يعيشوا هناك … فأنا بس كنت باستسمحك اروح اعمل معاهم الواجب …مش هاعوق … كلها نص ساعة نجبر بخاطرهم وارجع على طول … قال فؤاد ماشي يا ست الكل ..انا كمان هنزل دلوقت … ابقي روحي مع الست أصلاح او الست تينا … قامت ازهار قوام جهزت نفسها ونزلت هي والست إصلاح… اول ما دخلوا العمارة… شموا ريحة قهوة جامدة جدا … وسمعوا شوية موسيقى عاليه كده هما مش فاهمنها.. بس كانت حلوة … دخلوا لقوا العروسة متغطية ايديها ورجليها ووشها بحاجة شبه القهوة … استغربت الست ازهار ودخلت … باركت للست فلورا وقعدت جنبها وبدأت البنات ترقص وتضحك حوالين العروسة .. سالت ازهار الست فلورا وهي بتشرب فنجان القهوة بتاعها .. ولا مؤخذة يا ست فلورا … هو العروسة حاطة ايه .. ضحك فلورا وقالتلها … اقولك وما تضحكيش … دي قهوة … بنخلطها بماية ورد من بليل ووقت الحنة بندعك جسم العروسة ووشها بيه لاجل جسمها يبقى مشدود وبيلمع كده وريحته حلوة ردت ازهار وهي مستغربة … يا سلام معقولة … قالتلها فلورا …ايوة دي عوايد بنعملها في بلدنا ليلة الحنة … تجهيز العروسة يعني .. ده لسه كمان بنحط على شعرها قهوة كمان وتقعد بيها .. لاجل تخلي شعرها بيلمع وطري ردت ازهار وقالت سبحان الله … كل ناس وليها طبعها … الف مبروك يا ست فلورا …ربنا يتملها على خير وراحت حاطة في ايدها ظرف مقفول فيه فلوس وقالتلها دي نقطة العروسة ربنا يحفظها ويهدي سرها يارب … ضحكت فلورا واخدت ازهار بالحضن وباستها وقالتلها عقبال أولادك يا ازهار … وبدأت مراسم ليلة الحنة الإيطالي من رقص وضحك واستغربت ازهار لما لقيتهم بيكسروا الصيني وعرفت ان دي من عوايدهم … رجعت ازهار وقعدت تحكي لفؤاد عن كل حاجة شافتها عند الست فلورا وهي مستغربة
من هنا نعرف … ان القهوة يا سادة … كان ومازال ليها استخدامات كتير مش بس تتشرب … لا دي دخلت في مجال التجميل … ايشي كريمات وايشي صبغات … وكمان بتستخدم في بعض الأدوية ..
النهاية …. طولت عليكم … قولولي روحي شوفي اللي وراكي … فوتكوا بعافيه
