الملكة الأم والأم الملكة

الملكة الأم والأم الملكة👑

بقلم:فاتن جلال(مامافاتن)

أنا عودت نفسي من فترة إني ماكتفيش بالصورة اللي بتتنقل ليا عن طريق وسائل التواصل أو عن طريق التليفزيون .

بقف ثواني وأفكر عن الدوافع والخلفيات والنتايج ورا الخبر أو المعلومة.

بعتبر دي وسائل تعليمية ،بالذات لو في إطار إهتماماتي وهوالأسرة والعلاقات الإجتماعية.

العائلات المالكة والرئاسية مهما كبرت أو صغرت هي عيلة بنفس تكوين (العيلة العادي)،عندهم إشتراطات ،وبروتوكولات ،وإلتزامات دبلوماسية ماختلفناش بس في الأخر أب وأم وأولاد وأهداف منها اللي بيتحقق ومنها اللي بتكعبله الظروف .

بتفرق معاهم إن الوجود تحت الضوء طول الوقت موتر جداً وبيعمل إزدواجية في الشخصية من كتر إرهاق الإبتسامة المرسومة ،إبتسامة ممكن يكون وراها وجع أو إحباط (عادي بشر )

من فترة طويلة لفتت إنتباهي الملكة رانيا ،إبتسامتها الراقية ومظهرها الهادي وطريقتها في فرض أسلوب حياتها (أيوه أنا مدركة إني استخدمت لفظ فرض أسلوب حياتها )علي عيلتها الصغيرة واللي نفذته بسلاسة لحد ما أصبح أسلوب حياة الجميع

عارفين بتدير حياتها من علي كرسي المخرج

المخرج هو رب العمل زي مابيقولوا بلغة السينما رغم إن مش هو اللي كاتبه لكن الصور بتتحرك في دماغه ،شايفها علي هيئة صور متكاملة من ملابس و ديكور وإضاءة

تطور الشخصية وعلاقتها بالشخصيات المحيطة هو اللي بيحرك الفيلم وبينقلك للمشهد التاني.

كان كل فترة مع مشاركتها في أي حدث أو إدلائها .

تصريح مظهرها ومفردات حديثها بتأكد إنها عارفة بتقول

إيه وبتعمل إيه راسمه لنفسها خط جرينتش وهمي هي بس اللي عارفه حدوده ،بتنظم جيشها

وأدواتها بُناءاً علي الصورة الذهنية اللي مابتفارقش عينيها ،عارفة إمتي تقف بعيد وإمتي تطبطب علي كتف جوزها أو تحضنه(عندي رسالة معينة لحد معين😂😂😂)

وكأي ست عربية كنت لا إرادياً بصقف👏👏لرد فعل الملك أو (سيدنا زي ما بتقول عليه الملكة)بيبتسم ويحضن الإيد اللي اتمدتله ولا ودانه بتحمر ولا بيعرق ولا بيظغرلها(كده يا رانيا مش قدام العالم😂😂😂)

سمعت تصريحاتها عن ولادها وهي بتقدم للعالم فكرة ذهنية عن المُنتج اللي هايخرجلهم قريب

أولادي لا يدخل الخدم إلي غرفهم ،يخدمون أنفسهم ولا يعاملون كأمراء👏👏👏👏

طيب منتظرين تشوفوا إيه بقي من علاقة راقية ورايقة كده

🥰🥰🥰🥰🥰

كلنا شوفنا خلال الزفاف الملكي وقبلها زفاف الأميرة إيمان

أم عادية حواليها أهلها وقرايبها ،عندها عيون في كل جوارحها وحواسها ،عارفة إحنا هانشوف إيه (اللي هي عاوزانا نشوفه)

مخرج الروائع رانيا أهدتنا كلنا نظارتها نشوف بيها المشاهد اللي رسمتها في خيالها وطبقتها علي أرض الواقع

مجهود ذهني وعصبي جبار وراه ذكاء ودراسة ووعي

ست مش عادية عارفة إمتي تدي كل واحد بريستيچه وإمتي وفين تسحبه منهم(كأم وربة أسرة عارفة إن لازم يبقي فيه وقت لسحب البريستيچ وتقويم إعوجاج أو تظبيط خروج عن النص)

بشر هم مش ملايكة ،بس التوقيتات منظمة والإبتسامة والدماغ المنتظمة مدرسة لوحدها ،مايسترو هو وفرقته فاهمين لغة العصاية مفيش نشاز.

أنا لا بتكلم عن مكانة إجتماعية ولا مستوي مادي أنا بتكلم عن حد عارف مشروعه وأهدافه وفاهم عاوز يوصل لإيه وبيضحي بإيه في سبيل ده يحصل

حد هو عارف إنه مهم لكن مش ماسك جرس وعمال يلف أنا مهم ياهانم ياللي هناك شوفتيني أنا مهم ،يا أستاذ صحي الأستاذ اللي جنبك وقوله أنا مهم😂😂😂😂😂

في العلاقات الإجتماعية تنسيق الأدوار وإحترامها وإحترام مساحتها والحرم اللي بيتحرك فيه صاحب الدور مهم جدا وفي النهاية الكل كسبان

حتي لو تخلي طرف عن دوره ،أثبتت التجارب إن واحد في أحيان كتيرة كفاية ومؤثر مادام محافظ علي خط أهدافه وقادر يصلب طوله ويفرض إحترامه علي الجميع

تحياتي لعلاقة ناجحة بين ست ورجل هو بيشتغل ملك وهي بتشتغل ملكة👏👏👏👏