حلقات مسلسلة لعشاق الجمال الاسمر الملقب بالقهوة
بقلم / مها بدوي القهوة وما فيها الحلقة العاشرة
صباح الجمال على عشاق الجمال الملقب بالقهوة … صباح الروقان والمزاج العالي ….
القهوة عالم كبير وحويط مليان حكاوي فيه اللي غاوي وفيه اللي هاوي فيه اللي قاعد جنب اللي هايم وفيه تلاهي وفيه عبر وفيه تلاقي كل البشر … وزي ما قلنا قبل كده ان حكاوي القهاوي ما بتنتهيش… وعرفنا ان القهوة عدت بمراحل كتير … وفي كل وقت وزمان كانت عنوان للروقان والمزاج العالي وكانت طقوس تجهيز القهوة بتمر بمراحل كتيره … وبين المراحل دي تبدى الحكاوي والضحكات ومعاها تدوب الحواجز وينطلق الخيال … عرفنا يا سادة ان القهوة استخدمها الإنسان في كل جانب من جوانب حياته … ومع مرور الزمن واكتشاف الإنسان طرق جديدة لتقديم الساحرة السمراء المعروفة بالقهوة .. ابتدت كتير من الشركات في مواكبة سرعة الزمن وبدأت تنتج قهوة سريعة ممكن تتعمل في زمن قياسي سريع يتناسب مع ثورة الشباب ورغبته في الجري سريعا في دروب الحياة …
مع مرور الايام زادت العلاقة بين أسرة فؤاد افندي وصديقه كمال افندي وخصوصا ان منى وازهار بقوا أصحاب خالص وعلاقتهم بقت زي الأخوات…ومع وجود الاولاد حسين وساميه اولاد كمال وسهير وشاكر اولاد فؤاد أصبحت علاقة الاسرتين ممتدة للأجيال الصغيرة وخصوصا ان حسين وسهير كانوا في نفس المدرسة وكمان في نفس الفصل … رجع فؤاد افندي للبيت لقى الست ازهار منتظراه كالعادة على باب الشقة وهي بتضحك وتقوله حمدالله بالسلامه يا سي فؤاد … ربنا ما يحرمني من دخلتك عليا … فرح فؤاد وابتسم لما دخل ولقى سهير وشاكر جايين عليه جري وهما بيضحكوا ويقولوا خلاص يا بابا احنا اخدنا الاجازة … هنسافر امتى …. عرف فؤاد ان في اتفاق خفي تم من ورا ظهره هو وصديقه كمال ما بين الاسرتين على الاستعداد للسفر كالعادة للفيوم عند الحاجه والدة ازهار وده علشان الاولاد يستمتعوا بجو الريف وجماله …دخل فؤاد الاوضه وجت وراه على طول ازهار … ضحك وقالها … الاولاد فتنوا عليكم خلاص … جهزتوا نفسكم للسفر امتى … قالتله وهي وشها احمر من الكسوف … والله يا سي فؤاد انت عارف ده عادة … ربنا ما يقطع لنا عادة يا اخويا ويخليك لينا … اهه بندلع على حسك يا سي فؤاد .. قالها … خلاص يوم الجمعه بعد الصلاة نتحرك للفيوم ان شاء الله… بس ما تنسيش تجيبي معاكي برطمان القهوة اللي جابه كمال من سفريته بتاعت بلاد بره… اصلي خلاص اتعودت عليه …قلتله حاضر ولو اني يا سي فؤاد مش عارفه … قهوة ايه دي اللي نسخن لها مايه وندوبها فيها … هي القهوة تحلى الا على السبرتاية ونتلم جنبها كده نحكي ونتحاكى … عموما اللي تشوفه يا اخويا … قالها طيب نتغدى بقى واعمليلي كوباية نسكافيه بسرعة لأحسن عندي مشوار ضروري اعمله … قعد فؤاد بعد الغدا وشغل اغنية ام كلثوم وسرح فيها وقعد يسمع الست وهي بتقول ( طول عمري بقول … لا انا قد الشوق … وليالي الشوق … ولا قلبي قد عذابه … وقابلتك انت لقيتك … بتغير كل حياتي)… دخلت ازهار وهي شايله صينية القهوة النحاس بتاعتها وعليها عدة القهوة بتاعتها ومعاهم كوباية كبيرة شبه الشاي بلبن كده بس ريحتها قهوة … وقعدت جنب فؤاد على الكنبه اللي تحت الشباك وحطت الصينية في النص …مسكت الكوباية وقدمتها لفؤاد افندي … مسكها فؤاد افندي وشفط منها شفطه واحده …. وقالها الله … ايه الحلاوة دي شهد مكرر … ضحكت ازهار وقالت تسلم يا فؤاد افندي … قالها تاخدي شفطة … ردت بسرعة وقالت … لا يا خويا … انا ولا يعدل دماغي غير قهوتي … اتنهد فؤاد وقالت اااااه يا ازهار … قهوتك هو في حاجه زي قهوتك … بس نعمل ايه … اهو كل حاجه لازم نعملها بسرعة … ده حتى العيال بقت تشرب النسكافيه … ضحكت ازهار وقالت يا سي فؤاد ربنا يحلي ايامك … قام فؤاد وجهز نفسه … وفي نفس الوقت ازهار مسكت كوباية فؤاد وشمتها كده … الريحه ريحة قهوة بس الشكل مش قهوة … مصمصت شفايفها وقالت .. عيشنا وشفنا … بقى البتاع ده بدل القهوة وحلاوتها …
من هنا يا سادة نعرف ان كل حاجه حصل لها تغيير علشان تمشي مع عصر السرعة .. حتى القهوة بقت يا دوب ندوبها في شوية مايه سخنه او لبن وتعمل لنا فنجان نسكافيه يعدل الدماغ ويفوق مؤقتا
قصر الكلام … طولت عليكم قولولي روحي شوفي اللي وراكي … فوتكوا بعافيه
