طاجن الفريك
طاجن الفريك
بقلم / مها بدوي
اكلة وحدوتة
بقلم مها بدوي
طاجن الفريك حكاية أكلة وحدوتة النهاردة مساء الجمال… مساء السعادة…. مساءكوا هادي ونادي بإذن الله… مساءكوا قهوة مضبوطه تعدل المزاااج ☕️❤️☕️❤️
رمضان أيامه بتجري … يوم في ليلة … ايامه حلوة … بس زي اي حاجه حلوة بتخلص قوام …. ايامه عدت … ١٠ مرق و ١٠ خرق و١٠ حلق … الايام الأولى الناس ملهية في تجهيز اشكال والوان للفطار … عزومات واصناف … مطابخ مشغولة بالمحمر والمشمر …نخلص منهم تبدأ الايام الوسطانيه وتجهيز لبس العيد ولوازمه للعيال … لبس وبدل … شنط وجزم … فرحة كبيرة تملا البيوت بلبس العيد وجماله … ونبدأ نجهز للكحك والبسكويت … دقيق وسكر وسمنه بلدي من اللي قلبك يحبها … ستات تتجمع كل يوم عند جاره … يساعدوا في الكحك والبسكويت … دور كل واحدة جاي … ضحك وفرحة واغاني العيد الحلوة … صاجات مرصوصه بكحك نازله وصاجات دخلة بتراب الفرن .. ريحتها ماليه الجو فرحة وبهجة …
فؤاد افندي صحي بدري وجهز نفسه … علشان يلحق الشغل … ونادى على ازهار وهو نازل …. وقال … ايوه يا ست الستات طلباتك ايه النهاردة … ضحكت الست ازهار وقالت … تسلم وتعيش يا سي فؤاد …
ربنا يخليك لينا … مش ناقصنا حاجه … انت عارف انا هاعملك ايه على الفطار النهاردة …. طاجن فريك بالكبدة اللي كان نفسك فيه …. ضحك فؤاد افندي وهو بيلبس جاكتة البدلة بتاعته وقال … يا سلاااام يا ازهار … والله كنت لسه هاطلب منك تعمليه … بس انت قلبك حاسس بيا … ربنا يخليكي ليا وتفرحني كده دايما … احمر وش ازهار وقالتله … هو انا ليا مين غيرك يا سي فؤاد … ربنا ما يحرمني من كلامك الحلو ده …. على فكرة النهاردة ان شاء الله … تقول لسي كمال ومنى يجوا يفطروا معانا … اصل النية لله النهاردة نعمل الكحك بتاعنا وبتاع منى والجيران هيبقوا معانا … موسم كل سنه وانت طيب يا سي فؤاد
نزل فؤاد افندي … وبدأت الست ازهار تجهز للفطار وفي نفس الوقت تجهز لوازم الكحك والبسكويت
بدأت الست ازهار تجهز لطاجن الفريك
👈جابت الفريك وغسلته غسله كويسه ونقعته في المايه شوية
👈جابت الكبدة والقوانص نضفتها كويس وشالت كل الدهن الزايد وقطعتهم صغيرين ونقعتهم في مايه وخل علشان تطلع الزفارة منها
👈في حلة صغيرة … حطت معلقة سمنه كبيرة وعليها كام فص توم مهروسين وسابيتهم يتحمروا سنه … ونزلت عليهم الكبدة والقوانص وشوحتهم شوية (نص تسوية)
👈صفت الفريك كويس قوي وعصرته ونزلته على الكبد وسابيتهم يتحمروا شوية
👈حطيتهم في الطاجن ونزلت عليهم بشوية شوربة ومعلقة سمنه بلدي على الوش وحطيتهم في الفرن لحد ما الفريك يتشرب الشوربة كلها والوش يحمر
رجع فؤاد وفتح الباب بالمفتاح … وسمعت صوته وهو بيقول اتفضل يا كمال … اتفضلي يا ست منى …. البيت بيتكو … طلعت ازهار من المطبخ وهي بترحب بالضيوف … يا اهلا وسهلا … ده احنا زرنا النبي …. البيت نور والله … واخدت الست منى بالحضن ودخلوا سوا المطبخ … علشان يلحقوا يجهزوا السفرة … وسمعت كمال افندي وهو بيقول … ريحة طاجن الفريك جايبه للحارة تحت يا ست ازهار سلم ايديكي … سمنه بلدي معتبرة … احنا سهرانين معاكوا للصبح النهاردة ومش مروحين الا ومعانا نايبنا من الكحك والبسكويت وابقي اتوصي بالغريبة والشكلمة يا ست ازهار اصل الواحد هفتان للحاجات الحلوة دي
ضحكوا الصحاب وسمعوا صوت مدفع الافطار واصل من القلعة واذان المغرب مالي الشوارع …. وقعد الصحاب يفطروا سوا …. وبدأت الحكاوي بينهم وقعدة البلكونة وصوت صلاة التراويح مالي المكان
وبدأت رحلة تجهيز الكحك والبسكويت في المطبخ
طولت عليكم … ووجعت دماغكم …بس قعدتكم ما تتملش … قوليلي قومي شوفي اللي وراكي … فوتكوا بعافيه
